Ndonëse u paralajmërua se hapja e urës së Ibrit në Mitrovicë do të bëhet në muajin mars, një gjë e tillë ende nuk ka ndodhur, derisa arsyet mbeten të paqarta.
Një muaj më parë, me urdhër të kryetarit të komunës veriore, Goran Rakiq,u ndërprenë punimet për shkak të, siç tha ai, incidenteve që ndodhën atje. Por kjo nuk po del të jetë arsye e vërtetë. Sipas ministrit të Mjedisit dhe Planifikimit Hapësinor, Ferat Shala, komuna veriore që do të duhej të implementonte këtë projekt, ka pasur probleme financiare, raporton KTV.
Nënkryetari i Mitrovicës Jugore, Faruk Mujka, thotë se në pjesën jugore punët janë kryer me përpikëri, derisa kërkon nga Bashkimi Evropian që t’i bëjë presion komunës veriore.
Ndërsa Zyra e BE-së në Prishtinë, ka thënë se pret që ky projekt të përfundojë shumë shpejt, pa dhënë ndonjë datë se kur do ndodhë një gjë e tillë.
Kujtojmë se kanë kaluar pothuajse dy vite nga fillimi i punimeve për rivitalizimin e urës së Ibrit në Mitrovicë, në bazë të marrëveshjes që përkon me lirinë e lëvizjes të arritur më 25 gusht 2015, mes Prishtinës dhe Beogradit në Bruksel. /tesheshi.com/
