Ligjvënësit britanikë miratuan një ligj që do të lejonte vendin të largohej nga Bashkimi Evropian më 31 janar, duke i dhënë fund më shumë se tre vjet tensioneve për kushtet e “divorcit”.
330 deputetë votuan pro, ndërsa 231 kundër. Projekt-ligji do të zbatojë marrëveshjen e daljes nga BE, e cila u arrit me Unionin vitin e kaluar, thekson Reuters.
Kjo lejon kryeministrin britanik Boris Johnson të kthejë faqen e një prej krizave më të thella politike që ka goditur vendin në dekadat e fundit.
“Është koha që Brexit të përfundojë. Ky projektligj e mundëson këtë”, tha ministri i Brexit-it, Stephen Barclay para deputetëve.
Zëdhënësi i kryeministrin britanik ka thënë më parë se miratimi i projekt-ligjit do të jetë një “hap i rëndësishëm pozitiv”.
Më 31 janar, Johnson pritet të ndajë Britaninë nga 27 vendet e tjera anëtare të BE-së, duke e bërë atë vendin e parë që largohet nga Blloku.
Pastaj fillon një periudhë e vështirë e negociatave tregtare që do të përcaktojnë marrëdhëniet e reja të Britanisë me Evropën, partnerin kryesor të saj tregtar. /tesheshi.com/
