Një ditë pas inagurimit të sheshit “Skënderbej”, kryetari i bashkisë së Tiranës, Erjon Veliaj ka inaguruar edhe parkingun publik nëntokësor me mbi 300 vende, i pari i tillë në kryeqytetin shqiptar.
“Kishim mijëra njerëz në shesh mbrëmë në darkë, që ishte freskët, por kemi mijëra njerëz edhe sot paradite, kur ka diell. Ndaj, besoj se sheshi ka marrë notën 10, nga vlerësimi që po i japin njerëzit që e vizitojnë. Të parkosh sot në qendër të Tiranës është më mirë sesa një orë parkimi në rrugë. Nëse qytetarët kanë më shumë sesa një orë punë në qendër, u bie më lirë të parkojnë në parkingun e sheshit ‘Skënderbej’. Politika e parkingut është e vështirë si mentalitet, por të mos harrojmë se njerëzit gjithmonë e kanë paguar parkimin, thjesht nuk ia kanë paguar Bashkisë, por ia kanë paguar atij që me një arkë zinte vendet e parkimit dhe nën kërcënimin se do t’i gërvishte makinën, ua merrte ato parà”, tha Veliaj.
Veliaj bëri me dije dhe risinë e këtij parkingu:
“Është një risi që po e programojmë. Ky është parkimi i parë nëntokësor në Tiranë, por edhe parkimi i parë nëntokësor me karikim elektrik. Edhe parkingu nëntokësor te ‘Bulevardi i ri’ do të ketë vende të posaçme për makinat elektrike. Flota më e madhe e makinave elektrike momentalisht është e Policisë së Shtetit, por do të shtohet edhe me flotën e Bashkisë. Ka rreth 70-80 qytetarë që tashmë kanë makina elektrike dhe kemi menduar që ta kapim menjëherë teknologjinë me të cilën po ecën bota sot”
Parkimi nëntokësor në sheshin “Skënderbej” do të menaxhohet nga bashkia e Tiranës. Të ardhurat nga ky shërbim sipas kryetarit të bashkisë do të shkojnë për investime të tjera publike. /tesheshi.com/
