Në këtë seminar po marrin pjesë studiues nga vende të ndryshme të botës të cilët do të paraqesin hulumtimet e tyre në fushën e gjuhësisë, letërsisë e kulturës shqiptare gjatë dy javëve sa do të zgjasë aktiviteti. Temë bosht nga gjuhësia është “‘Shqipja në domenin publik”’, nga letërsia “Letërsia dhe religjioni”, ndërkaq në fushën e kulturës tema bosht është “Kultura shqiptare në tranzicion”.
Në rolin e mikpritwsit të këtij seminari i pari foli dekani i Fakultetit të Filologjisë Sedat Kuçi, i cili tha se fillimi i tij paraqet një shenje dalluese për mbarë Kosovën.
“Për Fakultetin e Filologjisë dhe Universitetin tonë kjo ditë është një ditë e shënuar. Ky seminar siç është thënë edhe herëve të tjera, është bërë shenj dalluese, shenj nderi jo vetëm e fakultetit të Filologjisë dhe Universitetit të Prishtinës, por edhe e qytetit të Prishtinës dhe mbarë Kosovës”, tha Kuçi.
I pranishëm në këtë ngjarje krahas presidentes së vendit Atifete Jahjaga, ishte edhe kryeministri Isa Mustafa, i cili në fjalën e rastitvlerësoi seminarin si ambasador shumë të rëndësishëm të komunikimit kulturor të Kosovës me botën, duke potencuar sidomos vazhdimësinë kohore të organizimit, dimensionin e hulumtimeve shkencore të gjuhës, letërsisë dhe kulturës shqiptare, si dhe përmasat dhe pjesëmarrjen e studiuesve nga mbarë bota.
“Gjuha shqipe ka luajtur rol shumë të rëndësishëm në progresin tonë historik, politik dhe ekonomik, si dhe në atë social, prandaj një gjë është e sigurt, pa gjuhën shqipe të ruajtur dhe të kultivuar, kështu siç e kemi bërë, kombi ynë nuk do të mund të qëndronte përballw valëve dhe historisë me të cilën ne jemi ballafaquar”, ka theksuar Mustafa.
Ky seminar organizohet në bashkëpunim me Tiranën, e për ta përshëndetur hapjen e këtij seminari i pranishëm ishte edhe ambasadori i Shqipërisë në Kosovë Qemal Minxhozi. Ai në fjalën e tij tha se ky seminar kaq prestigjioz siç është Seminari Ndërkombëtar për Gjuhë, Letërsi dhe Kulturë Shqiptare, nuk ka vlerë vetëm për Kosovën dhe rajonin, por sipas tij, është shumë i rëndësishëm edhe për ndërkombëtarët.
“Jemi mbledhur të gjithë sot në këtë eveniment shumë të rëndësishëm, kur flasim për gjuhën, letërsinë dhe kulturën kemi parasysh një varkë shumë të madhe të mbajtur jo vetëm në Kosovë, por breza e brezash studiuesish, në vite e në dekada dhe me përkushtimin e tyre kanë bërë ç’është e mundur për të mbajtur gjallë amanetin e rilindësve. Krahas kombit ata përmendin gjuhën, me gjuhën mbijetoj një vend i okupuar mizorisht me dekada, ajo që nuk e bëri të mposhtet Kosova ishte gjuha shqipe. Dyzet vjet, katër dekada, gjuha jo vetëm që ka mbijetuar por edhe është zhvilluar me një ritëm shumë të shpejt” u shpreh Minxhozi.
Ndërsa drejtori i Seminarit, Rrahman Paçarizi, tha se sa u përket sesioneve shkencore sivjet ka një risi në krahasim me vitet e kaluara. Sipas tij, përveç sesionit të gjuhësisë dhe letërsisë, sivjet do të ketë edhe sesion të punës në fushën e kulturologjisë.
Mbi 120 studiues do të shpalosin kumtesat e tyre në edicionin e 34-të të Seminarit Ndërkombëtar të Gjuhës, Letërsisë dhe Kulturës Shqiptare. Pjesëmarrjen në këtë edicion e kanë konfirmuar edhe 130 studentë, të cilët do t’i ndjekin kurset e gjuhës shqipe në tri nivele. Duke nisur nga sot për dy javë rresht, studiues nga vende të ndryshme të botës do të paraqesin hulumtimet e tyre në fushën e gjuhësisë, letërsisë e kulturologjisë, ka theksuar Paçarizi./tesheshi.com/
Përgatiti: Shkëlzen Rrecaj
