E paralajmëroi pak ditë më parë dhe ministri Xhafaj vijimi i arrestimeve për abuzimet me pronat në bregdet.
Prokuroria ka hapur si “papritur” kapitullin e dhënieve të tokave shtetërore në bregdet, ku zona e Kavajës është një ndër territoret ku është bërë kërdia në vite. Këto dosje nuk kanë kursyer edhe kryebashkiakun e Rrogozhinës që është marrë në pyetje për dhënien e tokave ndaj personave privatë. Prokuroria ka shpallur në kërkim një biznesmen, Idlir Karkinin, për të cilin gjykata ka dhënë masën e arrestit me burg. Karkini ka privatizuar në shkelje me ligjin pronën e Ministrisë së Mbrojtjes në Spille (poligon qitjeje) dhe ka ndërtuar aty një biznes privat.
Karkini është një personazh i njohur pasi zotëron mirëmbajtjen e sistemit të radarëve të FA, si dhe njihet si përfitues i shumë tenderave, ndër to për mbarëvajtjen e rrjetit të dixhitalizimit ku kompania e tij “Idea-Tel” fitoi pa tender 8.8 mln euro, kur ende nuk ishte ngritur rrjeti. Prokuroria e Kavajës ka nisur një hetim për 10 persona, mes tyre edhe kryebashkiakun Nuredini të cilët akuzohen për tjetërsim të pronave shtetërore ranishte dhe kthimin e tyre në prona private për interesa të palëve të treta.
Pak pasi Prokuroria shpërndau njoftimin e saj në lidhje me ecurinë e hetimit për abuzimin me pronat shtetërore në bregdetin e Spillesë, kreu i Drejtorisë për Hetimin Ekonomik e Financiar në Policinë e Shtetit doli me një deklaratë për mediat ku dha disa detaje të tjera në lidhje me këtë rast.
Lutfi Minxhozi tha se bëhet fjalë për rreth 110 mijë metër/katrorë prona shtetërore që janë tjetërsuar përmes falsifikimit të dokumentacionit dhe abuzimit të detyrës nga pushtetarët vendorë në Kavajë e Rrogozhinë. /tesheshi.com/
