Gjykata e Apelit për Krimet e Rënda ka shqyrtuar sot apelin e 10 prej doganierëve dhe punonjësve të policisë, të arrestuar në kuadër të hetimeve për trafikimin e 10 tonëve kanabis drejt Italisë.
Kjo gjykatë ka lënë në fuqi vendimin për masë sigurie “arrest në burg” për shtetasit Mexhit Xhixha, Agron Kapllani, Roland Metani, Maliq Kadilli, Nezir Bardhoshi, Behar Sula dhe Gëzim Dervishi.
Nga ana tjetër gjykata ka ndryshuar masën duke e kthyer atë në “arrest shtëpie” për Edmond Luzin dhe Vladimir Ziun.
Doganierë dhe punonjës policie u arrestuan në një aksion të përbashkët të disa vendeve. Urdhër-arrestet u lëshuan për 18 persona, të akuzuar për lidhje me trafikun e tonelatave të drogës në drejtim të Italisë. Në datën 5 shkurt në Itali u kap një kamion me 8 ton drogë, e cila kishte hyrë në Shqipëri nga Maqedonia, duke kaluar kështu dy pika doganore, atë të Qafë Thanës dhe të portit të Durrësit.
Një tjetër rast që implikon të akuzuarit është ai i 24 marsit, kur në Itali u kap një kamion me shofer shqiptar, me rreth 2.2 ton kanabis.
Dyshohet se rruga e drogës ishte e mbrojtur nga zyrtarë të policisë dhe doganierë në mënyrë të organizuar./tesheshi.com
