Këtë krem të ftohtë nuk mund ta quajmë as ëmbëlsirë sepse ka aq pak përbërës dhe përgatitet shumë lehtë. Eshtë zgjidhja e duhur për një pasdite vere.
Koha e përgatitjes – 30 minuta
Përbërësit për 6 persona:
- 5 filxhanë me kafe ekspres ose kafe Nestle + 1 ose 2 lugë sheqer
- 500 ml pana e ftohtë, nga frigoriferi
- 3 fletë xhelatine (6 g të tria)
- 5 lugë sheqer pluhur
Përgatitja:
Përgatisim kafetë, u hedhim sheqerin dhe i lëmë të ftohen.
Fletët e xhelatinës i vëmë të hidratohen në një tas me ujë të ftohtë për 10 minuta. Më pas i shtrydhim me dorë nga uji i tepërt dhe i tresim në një tigan në flakë, me 2 lugë pana. E heqim pa marrë valë akoma dhe e lëmë mënjanë të vaket.
Bëjmë marengë me panën (si të ngrirë) duke shtuar pak nga pak sheqerin pluhur. Më pas marrim 2 lugë nga pana dhe i shtojmë në tiganin ku kemi tretur xhelatinën. Më pas, këtë e hedhim në tasin ku kemi panën. E përziejmë me kujdes me spatul, me lëvizje nga poshtë lart derisa të bëhet krem homogjen.
Kafenë e ftohur e shtojmë në tasin ku kemi përzierjen tonë. E përziejmë me delikatesë derisa kremi të bëhet homogjen. Për ta nxjerrë sa më bukur, e hedhim kremin në një qese pastiçerie dhe mbushim gotat me të.
Në rast të kundërt, e shpërndajmë me lugë. Zbukurojmë kremin me pak pluhur kafeje dhe kokrra kafeje. I ruajmë në frigorifer, të mbuluara me qese kuzhine deri në momentin kur do t’i shërbejmë, por jo më pak se 3-4 orë. Të nesërmen është akoma më e mirë./tesheshi.com/
