Pas dhjetë vitesh punë, sot është përuruar Xhamia e Moskës, e cila do t’u mundësojë 10.000 besimtarëve muslimanë të falen njëkohësisht.
E ngritur tërësisht prej donacioneve private, ajo është hapur në prag të Kurban Bajramit, me praninë e presidentit rus, Vladimir Putin, të presidentit turk, Rexhep Tajjip Erdogan, dhe të presidentit palestinez, Mahmud Abbas.
Xhamia ka kushtuar 170 milionë dollarë, dhe është një prej gjashtë të tillave në qytet. Moska ka rreth dy milionë muslimanë, ndërsa kërkesat për të ndërtuar më tepër xhami nuk janë pritur mirë nga zyrtarët dhe banorët e qytetit.
Islami është në Rusi feja e dytë më e madhe, me 23 milionë muslimanë. Shumica e tyre jetojnë në republikat e Kaukazit të Veriut.
Kjo xhami u ndërtua mbi themelet e një xhamie më të vogël, më tepër se 100-vjeçare, e cila u shkatërrua në vitin 2011.
Xhamia e Moskës do të jetë e dyta për nga madhësia në vend, pas një tjetër xhamie që po ndërtohet në Ufa, e që mban emrin Salavat Julajev. /tesheshi.com/
