Çmimi i Madh i Meksikës fitohet nga Lewis Hamilton, që mban kështu ende të hapur garën për titullin kampion, duke e ngushtuar në 19 pikë diferencën me Nico Rosberg-un, kryesuesin e botërorit të Formulës 1.
Britaniku nuk e ka vënë për asnjë çast në dyshim fitoren, duke kryesuar që në metrat e para në autodromin “Hermanes Rodriguez”.
Rosberg e ka kaluar finishin i dyti, duke qenë i kënaqur me atë çka arriti.
Dy momente kulmore ka patur gara e Meksikës, xhiron e parë dhe ato të fundit. Në nisje është Hamilton që del jashtë piste dhe rifutet në të i pari. Asnjë urdhër për të që t’u hapë rrugën të tjerëve! Për ta vazhduar garën më tutje i pashqetësuar, gjer në finish.
Po në nisje, Verstappen e detyron Rosberg-un të dalë jashtë piste. Përsëri asgjë, asnjë reagim nga komisarët e pistës!
Për të ardhur te xhirot e fundit, kur i riu Verstappen, holandezi problematik, pret shkurt në pistë në garë me Vettel-in dhe vazhdon ta mbajë gjermanin prapa teksa luftohet për vendin e tretë. Urdhri vjen për ta lëshuar vendin e tretë, por asgjë nuk e bind pilotin e ri, që e kalon finishin i treti dhe e nervozon pa fund Vettel-in.
Hamilton i pari, Rosberg i dyti, Verstappen i treti… Por holandezi penalizohet me pesë sekonda, dhe në podium ngjitet Vettel si fitues i vendit të tretë.
Krejt e pazakontë ajo që ka ndodhur sonte: një pilot që nuk u bindet urdhrave të komisarëve, e që në fund dënohet!
Dhjetëshja e parë në mbarim të garë qe kështu kjo: Hamilton, Rosberg, Vettel, Ricciardo, Verstappen, Raikkonen, Hulkenberg, Bottas, Massa dhe Perez.
Rosberg ka 349 pikë kur kanë mbetur dhe dy gara për t’u zhvilluar. 330 pikë ka Hamilton.
Pas dy javësh vjen gara e parafundit, ajo e Brazilit. /tesheshi.com/
