Dhjetë ditë pas asaj përplasjeje fatale në Spanjë, që i nxori jashtë gare që në xhiron e parë të dy makinat Mercedes, Hamilton e Rosberg kanë qetësuar ujërat midis tyre.
“U ulëm dhe folëm me njëri-tjetrin; asnjë problem,” mësohet t’u ketë thënë Hamilton gazetarëve me të mbërritur në Monako, ku kanë nisur përgatitjet për garën e gjashtë sezonale të Formula 1-shit.
“Në të shkuarën duhet të ketë patur njëfarë tensioni, por tani është thjesht respekt i pastër. Unë i thashë, ‘kam gjithë respektin për ju,’ e ai më tha të një njëjtën gjë, prandaj le të vazhdojmë të garojmë,” ka hedhur dritë mbi bisedën britaniku, kampioni i botës në fuqi.
“Nuk patëm nevojë të flisnim mbi incidentin. E dimë se çfarë ngjau; ishim atje, e përjetuam atë, dhe e dimë se ç’ndjemë për të,” shton ai për përplasjen e dy javëve të shkuara.
Shokë e rivalë që në hapat e para të karrierës së tyre në botën e garave automobilistike, Hamilton e Rosberg e patën thyerjen e parë dy vite më herët, në garën e Belgjikës, në një incident të ngjashëm.
Marrëdhënia mes tyre që prej asaj dite nuk ka qenë kurrë më ajo e para. Gara e së dielës në Monako do të jetë përsëri jo e lehtë për ta. Gjermani i Mercedes-it, Nico Rosberg, e ka fituar këtë garë në tre vitet e fundit, por asnjëherë nuk kanë munguar polemikat me Lewis Hamilton-in. Britaniku, në anën tjetër, ka triumfuar vetëm një herë në këtë pistë të improvizuar, tetë vite më parë, kur pilotonte për McLaren-Mercedes-in.
Rosberg e kryeson kampionatin aktual, kurse Hamilton gjendet në vend të tretë, me 43 pikë më pak. Britaniku e ka fituar dy herë botërorin me Mercedes-in, ndërsa Rosberg kërkon të shpallet kampion këtë vit për herë të parë. /tesheshi.com/
