Të paktën 14 civilë janë vrarë dhe disa të tjerë u plagosën në një seri sulmesh me bomba fuçi në zonat e mbajtura nga rebelët pranë Damaskut, kanë thënë aktivistët për Al Jazeera.
Sulmet ajrore të qeverisë siriane kanë vënë në shënjestër qytetin e Wadi Barada, në veriperëndim të kryeqytetit të hënën, me ç’rast janë plagosur dhjetëra njerëz, duke përfshirë disa fëmijë, kanë thënë aktivistët.
Sipas videove të postuara në rrjetet sociale nga ana e grupeve opozitare, regjimi sirian ka intensifikuar sulmet e saj në qytet.
Helmetat e Bardha, një ekip përgjegjës për nxjerrjen dhe shpëtimin e njerëzve nga shtëpitë e bombarduara, kanë thënë se një numër njerëzish janë të bllokuar nën rrënoja pas bombardimeve të rënda.
Bombat fuçi janë të ndërtuara në mënyrë tipike nga bure të mëdha të naftës të mbushura me eksploziv, gozhda dhe hekurishte.
Gazetari i Al Jazeera-s, i cili raporton nga Gaziantep në anën turke të kufirit Turqi-Siri, tha se regjimi sirian ka filluar për të tretën ditë me radhë një ofensive kundër Jaish al-Islam, i cili kontrollon Wadi Barada dhe është një nga grupet më të fuqishme që luftojnë forcat e presidentit Bashar al-Assad.
Të premten, ushtria siriane dhe grupi i armatosur libanez Hezbollah, nisi një operacion për të rimarrë Wadi Barada, pasi akuzoi rebelët se kanë kontaminuar ujin e pijshëm me naftë.
Sipas një raporti të publikuar në fillim të këtij viti, më shumë se një milion sirianë besohet të jenë të bllokuar në 46 komunitetet në të gjithë vendin.
Lufta civile në Siri ka filluar si kryengritje kryesisht e paarmatosur kundër Asadit në mars të vitit 2011, por është zhvilluar shpejt në një konflikt të armatosur.
Staffan de Mistura, i dërguari i posaçëm i OKB për Sirinë, vlerësoi në prill se më shumë se 400,000 sirianë janë vrarë që nga viti 2011.
Llogaritja e një numri të saktë të vdekjeve është e pamundur, pjesërisht për shkak të zhdukjes të dhjetëra mijëra sirianëve, fatet e të cilëve mbeten të panjohura.
Gati 11 milionë sirianë – gjysma e popullsisë para luftës në vend – janë zhvendosur nga shtëpitë e tyre. /tesheshi.com/
