Në përfundim të vizitës se tij në Bruksel, kryetari i Kuvendit Ilir Meta, i shoqëruar prej ministres së Integrimit, Klajda Gjosha, u pritën nga Komisioneri Evropian për Zgjerimin, Johannes Hahn.
Meta i shprehu mirënjohjen Komisionerit Hahn për punën e Komisionit Evropian në hartimin e progres-raportit të fundit për Shqipërinë si dhe për rekomandimin pozitiv në mbështetje të çeljes së bisedimeve për anëtarësim me Bashkimin Evropian. “Shqipëria shpreson që edhe Këshilli të ndajë të njëjtin opinion me Komisionin, gjatë mbledhjes së tij të ardhshme gjatë këtij muaji”, tha Meta.
Komisioneri Hahn theksoi se suksesi i reformës së drejtësisë dhe ligjit të dekriminalizimit në Shqipëri do të prodhojë lajme të mira për gjithë rajonin e Ballkanit, i cili ka nevojë për momente pozitive.
Kryetari Meta dhe Komisioneri Hahn biseduan edhe mbi zhvillimet e fundit në rajon, ku u theksua veçanërisht rëndësia e Procesit të Berlinit dhe ajo e avancimit të dialogut me rezultate të prekshme mes Kosovës e Serbisë, si dhe rëndësisë së madhe të mbarëvajtjes së zgjedhjeve të ardhshme në Maqedoni.
Duke vlerësuar rolin tradicional pozitiv të Shqipërisë në rajon, Meta dhe Hahn ndanë bindjen e përbashkët se Ballkani ka nevojë për forcim të stabilitetit, ndërlidhjes dhe sigurisë, dhe në këtë kontekst marrëdhëniet solide të fqinjësisë së mirë dhe bashkëpunimit rajonal duhet të shkojnë vetëm drejt forcimit dhe intensifikimit, me të gjithë fqinjët dhe vendet e tjera të rajonit./tesheshi.com/
