Pas deklaratës së Komisionerit Han dhënë në Uashington, në të cilën tha se ciklet e fundit zgjedhore në Maqedoni janë vlerësuar pozitivisht nga OSBE-ja, gjë që bëri liderin opozitar Zoran Zaev të anulojë shkuarjen e tij në Bruksel, për ku më 10 qershor është caktuar takim liderësh, ka qenë vet kryekomisari Hahn që ka marë në telefon Zaevin për t’i sqaruar atij se deklarata është transmetuar keq.
Bisedën telefonike e ka konfirmuar Komisioni Evropian, në deklaratën e të cilit thuhet se komisari Hahn qartë dhe në mënyrë konçize i ka vërtetuar pohimet e OSBE/ODIHR-it për ndarjen joadekuate të shtetit nga partia, të dhënat për frikësim të votuesve, animin medial në dobi të partive në pushtet si dhe shqetësimin e KE-së për saktësinë e Listës Zgjedhore, që njëherit paraqesin vërejtjet substanciale të LSDM-së.
Hahn ka shtuar më tej se më 10 qershor në Bruksel do të merret vendim se çfarë Qeverie do t’i përgatisë dhe zbatojë zgjedhjet e jashtëzakonshme të dakorduara për prillin e vitit të ardhëshëm, kur kihet parasysh fakti se Zaev insiston për një qeveri kalimtare në krye të së cilës nuk do të jetë kryeministri i tanishëm Nikolla Gruevski.
Edhe pse qëndrimet e fundit të eurokomisarit Han dhe Komisionit Evropian për LSDM-në hapin mundësinë për mbajtjen e takimit në Bruksel, zyrtarë të saj dyshojnë në aftësinë e diplomacisë evropiane që të zgjidh ngërçin politik, duke shpresuar kështu në kyçjen e diplomacisë amerikane: “Sjellja e Johannes Hahn paraqet vazhdimësinë e qasjes në negociatat mes liderëve të katër partive kryesore, në të cilat negociata Zaev dhe Gruevski u trajtuan në mënyrë të barabartë, sikur këta dy kanë faj të njëjtë për krizën në vend”, deklaroi zyrtari i lartë i LSDM-së Stevo Pendarovski.
Sipas tij, nuk mund të ketë zgjidhje për krizën pa ndërmjetësim të përforcuar të diplomacisë amerikane, pasi siç thotë ai, të gjitha krizat e mëparshme në Maqedoni por edhe në Ballkan në përgjithësi, janë zgjidhur me përfshirjen vendimtare të Shteteve të Bashkuara: “Kjo vlen edhe për Marrëveshjen Kornizë në Maqedoni, atë të vitit 2001, e cila ishte hartuar nga amerikanët, e të cilën Evropa vetëm se e përkrahu. Në këtë fazë të negociatave, sipas mendimit tim, mungon një mekanizëm më i fortë për ndërmjetësim ndërkombëtar, ndërsa ndërmjetës të tillë nuk mund të gjeni brenda Bashkimit Evropian”, tha Pendarovski.
Takimi i katërshes politike, Nikolla Gruevski, Zoran Zaev, Ali Ahmeti dhe Menduh Thaçi më 10 qershor në Bruksel, vjen si rrjedhojë e atij të 2 qershorit në të cilin palët me ndërmjetësimin e eurokomesarit Han, u pajtuan për një periudhë tranzicioni deri në fund të prillit të vitit të ardhshëm kur do të ketë zgjedhje të parakohshme, por para kësaj është me rëndësiqë shteti të përgatitet për këtë situatë. /tesheshi.com/
