Në momente më kritike të krizës politike në Maqedoni, zëdhënësja e Komisionit Evropian, Maja Koçijançiç ka njoftuar se ditën e martë do të vijë për vizitë në Shkup Komisari për Politika Fqinjësore dhe Zgjerim, Johanes Hahn, së bashku me tre eurodeputetët Eduard Kukan, Ivo Vajgël dhe Knut Flenkeshtajn.
“Ata do të takohen me përfaqësuesit e gjithë partive politike, si dhe me presidentin Ivanov. Ata do të përsërisin porosinë e fuqishme të BE-së që të respektohet rezultati zgjedhor dhe të mundësohet që proceset demokratike të rrjedhin e sa më shpejt të formohet Qeveria, e cila do të vazhdojë të implementojë Marrëveshjen e Përzhinos”, ka thënë Maja Koçijançiç, zëdhënëse e KE-së.
Ajo ka kujtuar se dje në samitin e gjashtë liderëve të Ballkanit në Sarajevë, Hahn ka ripërsëritur nevojën e bashkëpunimit rajonal dhe ka paralajmëruar për rrezikun nga nxitja e tensioneve, përfshirë edhe marrëdhëniet ndëretnike nga deklaratat e pamatura të udhëheqësve politik.
Në pyetjen se a po përgatitet “Përzhino 3”, Koçijançiç theksoi se qëndrimi i Komisionit është që Marrëveshja e Përzhinos duhet të implementohet tërësisht.
“Vlerësojmë se përpos gjërave që duhen të ndodhin është që Marrëveshja e Përzhinos, ashtu siç e dini, duhet të zbatohet”, ka shtuar Maja.
Nga ana tjetër komisari Han për herë të fundit ka reaguar pasi presidenti Gjorgje Ivanov refuzoi ti japë mandatin kreut të LSDM-së, duke thënë se në një demokraci, shumica parlamentare duhet pranuar edhe nëse dikujt nuk i pëlqen./tesheshi.com/
