Gjyqi ndaj Pjetër Shalës, ish-pjesëtar i UÇK-së, i akuzuar për krime lufte në vitin 1999, filloi para Këshillave të Specializuara të Kosovës në Hagë.
Gjatë seancës së sotme, fjalët hyrëse janë paraqitur nga Prokuroria e Specializuar dhe përfaqësuesit e viktimave të këtij rasti, dhe në fillim Shala ka konfirmuar deklarimin e mëparshëm të pafajësisë.
Shala deklaroi se është i pafajshëm, ndërsa aktakuzën e lexuar nga Prokuroria e quajti të sajuar.
“Po, e kuptoj, këto janë shpifje dhe trillime, unë jam i pafajshëm”, tha Shala.
Sipas aktakuzës së lexuar nga përfaqësuesi i Prokurorisë Speciale, Pjetër Shala akuzohet në bazë të përgjegjësisë penale individuale për krime lufte në katër pika të aktakuzës: privim arbitrar i lirisë, trajtim mizor, torturë dhe vrasje.
Sipas aktakuzës, krimet janë kryer përafërsisht nga data 17 maj 1999 deri më 5 qershor 1999, kundër personave të burgosur në një fabrikë metali në Kukës, e cila përdorej nga UÇK-ja.
Prokurori i specializuar Alex Ëhiting në fjalën e tij hyrëse tha se shumica e viktimave janë shqiptarë të Kosovës, të cilët janë ndaluar pa asnjë proces ligjor.
“Një grup kriminal ndaloi dhe keqtrajtoi 18 viktima në qendrën e paraburgimit të ish-fabrikës në Kukës. Ky grup kriminal vrau një nga këto viktima. Viktimat ishin në shënjestër për shkak të afërsisë me serbët, trajtoheshin si bashkëpunëtorë dhe spiunë”, tha prokurori Ëhiting.
Prokuroria beson se provat se Shala ka qenë pjesë e një grupi që ka kryer krime. Në atë grup kanë qenë edhe Sabit Geci dhe Xhemshit Krasniqi, të cilët janë shpallur fajtorë për këto krime.
Sipas vendimit të mëparshëm të trupit gjykues, prezantimi i provave në këtë rast do të nisë më 27 mars.
Shala u arrestua në Belgjikë më 16 mars 2021 dhe u dërgua në paraburgimin e Këshillit të Specializuar më 15 prill 2021. /tesheshi.com/
