Anadoly Agency informon se shtetasi turk Muhammet Yasir Aydogmush, i akuzuar për terrorizëm në vendin e tij si pasojë e inkuadrimit në organizatën FETO, ka bërë kërkesë së fundi për azil politik në Shqipëri.
Ai u arrestua në portin e Durrësit në përpjekje për të udhëtuar drejt Italisë më pasaporte false, por gjykata e këtij qyteti e liroi për ta gjykuar në kushte lirie, gjë që solli dhe reagimin e ashpër të autoriteteve të Ankarasë, përmes një qëndrimit të ambasadës turke në Tiranë.
Sipas AA, kërkesa për azil e të ashtëquajturit gylenist, konfirmohet nëpërmjet vendimit të Gjykatës së Shkallës së Parë Durrës, marrë më datë 13 tetor.
“Më dt.13.10.2017 i arrestuari Muhammet Yasir Aydogmus rezulton të ketë paraqitur Kërkesë për azil politik në Republikën e Shqipërisë dhe mbrojtje nga shteti shqiptar pranë D.V.K.M, Durrës, (Drejtoria Vendore e Kufirit dhe Migracionit Durrës), kërkesë e cila është protokolluar me Nr.03/436 pranë këtij institucioni. Në kërkesën e tij për azil politik dhe mbrojtje nga shteti shqiptar shtetasi Muhammet Yasir Aydogmus ka parashtruar se këtë kërkesë ai e ka paraqitur verbalisht që në momentin e parë kur është ndaluar, por nuk ka dijeni pse nga autoritetet nuk është proceduar me shqyrtimin e kësaj kërkese, arsye për të cilën është detyruar ta paraqesë sërish me shkrim kërkesën për azil”, thuhet në vendimin e Gjykatës së Durrësit.
Nuk dihet se cili do të jetë vendimi i autoriteteve shqiptare, por për shtetasin në fjalë ka dhe një presion ndërkombëtar pro tij, më saktë nga BE, siç në rastin e lirimit nga gjykata. Nga ana tjetër, qeveria turke prej kohësh po i bën presion homologes shqiptare, që të reagojë ndaj strukturave dhe elementëve gylenistë në Shqipëri. /tesheshi.com/
