Në një konferencë për shtyp në Bruksel me kren e NATO-s Jens Stoltenberg, kryeministri Rama e përligji strehimin në Shqipëri të muxhahedinëve iranianë me traditën shqiptare, nga e cila sipas tij përfituan dhe hebrenjtë gjatë Luftës së Dytë Botërore.
“Shqipëria ka pranuar t’u japë strehë disa mijëra njerëzve, jeta e të cilëve është kërcënuar nga regjimi i Teheranit.
Është pjesë e asaj çka ne jemi, e traditës sonë. Ne kemi qenë vendi i vetëm që pas Luftës së Dytë Botërore kishte më shumë hebrenj dhe vendi ynë ishte një shtëpi e sigurt për ta.
E kemi bërë edhe këtë gjë si një operacion humanitar. Ne nuk do ta ndryshojmë traditën dhe qasjen tonë kundrejt këtyre njerëzve”, tha Rama.
Por i ndodhur nën akuzë nga një segment mediatik por dhe politik, mbi dëbimin e një shtetasi turk pas kapjes me pasaportë false, i konsideruar si gylenist, shefi i qeverië dha të kuptuar, me anë të një fjalie, se rastet janë të ndryshme. Këtu, ai përfshiu dhe dëbimin e diplomatëve iranianë.
“Sa për aktivitetet keqbërëse në Shqipëri, kemi dëbuar diplomatët dhe njerëz të tjerë që janë jashtë aktivitetit të rregullt të pjesës diplomatike”, tha Rama.
Fjala është pra për Harun Çalik, i cili muaj më parë u kap në tentativë largimi nga Shqipëria më pasaporte false, ndërkohë që po me pasaporte false kishte hyrë në territorin shqiptar. Për këtë ai u dënua me disa muaj burg dhe pas përfundimit të dënimit u kthye në Turqi. Kjo, nga një pjesë e medias, u përkthye si dëbim i padrejtë i një gylenisti nën kërcënimin e shtetit të tij. /tesheshi.com/
