Shpërthimi i ndodhur në Nju Jork e nga i cili u lënduan 29 persona ka qenë një akt terrorizmi. Kështu e ka përshkruar atë guvernatori i Nju Jorkut, Andrew Cuomo, i cili ka deklaruar, “Një bombë që shpërthen në Nju Jork është qartas një akt terrorizmi, por ai nuk është i lidhur me terrorizmin ndërkombëtar.”
Cuomo do të pranonte se cilësimi i tij i shpërthimit si terrorizëm varej nga definicioni mbi terrorizmin.
Duke deklaruar se shpërthimi nuk kishte lidhje me terrorizmin ndërkombëtar, guvernatori do të sqaronte, “Me fjalë të tjera, ne nuk kemi gjetur lidhje të ISIS-it.”
“Ne do t’i gjejmë, kushdo që t’i ketë vendosur këto bomba, dhe do t’i vëmë para drejtësisë,” ka shtuar Andrew Cuomo.
Gjithsesi, guvernatori nuk ka pranuar të spekulojë mbi hetimin.
Të gjithë të lënduarit nga shpërthimi e kanë lënë spitalin. “Ishim vërtet me fat që nuk kishim viktima,” qenë fjalët e guvernatorit.
Ai ka pohuar se jeta në Nju Jork do të vijojë si më parë. Ndërkaq, një personel shtesë sigurie prej 1.000 vetash po dislokohen në qendrat e transportit të Nju Jorkut. /tesheshi.com/
