Partia Demokratike ka zhvilluar një mbledhje të grupit parlamentar, pas tensioneve të krijuara në seancën e sotme, si rezultat i mospranimit nga mazhoranca të debatit mbi reformën zgjedhore dhe vendimit të Gramoz Ruçit për përjashtim nga seanca për shkak të shkeljes së rregullores.
E ndërsa Basha ka këmbëngulur për të zhvilluar një séancë të posaçme debati mbi në Kuvend mbi reformën zgjedhore, Berisha mësohet se ka kërkuar një ashpërsim të qëndrimit të deputetëve demokratë ndaj kryeparlamentarit Ruçi. Burimet bëjnë me dije se gjatë diskutimeve në grup, Berisha i ka kërkuar deputetëve demokratë që të jenë më luftarakë dhe të shfrytëzojnë çdo hapësirë ligjore dhe të Rregullores së Kuvendi.
Në këtë kuadër, mësohet se Berisha ka kërkuar që grupi të kërkojë interpelanca me ministrat apo debate për çështje të ndryshme. Burimet bëjnë të ditur se në mbledhje është propozuar një ashpërsim i qëndrimeve dhe bllokim të seancave parlamentare, nëse nga mazhoranca do të përdoren skenarë për heqjen e fjalës së opozitës, apo moslejimin e debateve. Në këtë kuadër, ligjvënësit demokratë pritet të kërkojnë mbledhjen e konferencës së kryetarëve ku do të paraqesin propozimet e tyre qoftë për interpelanca ashtu edhe për debatet politike. /tesheshi.com/
