Ish-kryeministrit maqedonas, Nikolla Gruevski nuk ka kursyer akuza në adresë të Prokurorisë Speciale. Ai, në një deklaratë për portalin maqedonas Telegraf, nuk ka hezituar që prokuroren speciale Katica Janeva, së bashku me ekipin e saj t’i quajë okupatorë me motive polike që kanë për qëllim të ndihmojnë partinë opozitare maqedonase, LSDM-në dhe ta dëmtojnë VMRO-DPMNE-në.
“Në mungesë të argumenteve kundër njerëzve që i kanë si cak, të cilët janë cak i shkatërrimit dhe eliminimit politik, mundohen të nxjerrin deklarata të rrejshme të dëshmitarëve, mundohen me frikësime dhe kërcënime të sigurojnë dëshmitarë të mbrojtur, njerëz të cilët fillimisht do t’i frikësojnë dhe pastaj ju ofrojnë bashkëpunim, ndërsa si kompensim nuk do t’i dënojnë”, ka deklaruar Gruevski.
Kjo deklaratë e tij vjen menjëherë pasi u paralajmërua se FBI-ja amerikane dhe BIA serbe (Agjencia e Sigurisë Informative), do t’i dorëzojnë Prokurorisë Speciale materiale që kanë të bëjnë me aktivitet krimiminal të qeverisë së VMRO-DPMNE-së. Në këtë listë ndodhen mbi 40 funksionarë të lartë të kësaj partie.
Deklaratat e këtilla të Nikolla Gruevskit, sipas analistit politik, Alajdin Demirit, duhet të analizohen në një kontekst tjetër, jo në kontekst të kërcënimit, por kontekst të frikës. Sipas tij, Gruevski çdokënd që nuk mendon njëjtë si ai e shpall armik.
“Nëse në kontinuitet i analizojmë gjitha deklaratat e Nikolla Gruevskit kohës fundit, do të shohim se gjithmonë atë që ka deklaruar ka ndodhur e kundërta në realitet. Në vazhdë të të gjitha këtyre deklaratave ai shpreh emocionet e veta, i kapur në krimin e vet dhe i vetëdijshëm se çfarë do të ndodhë. Andaj tani çdo gjë që është e kundërt me të ai e shpall armik. Psikologët e mirë mund të vlerësojnë dhe kuptojnë se panika e tillë e Gruevskit nënkupton “të shpëtojë çka mundem të shpëtojë”, deklaroi Demiri për tesheshi.com
Nga ana tjetër, kujtojmë që kreu i VMRO-së, Nikolla Gruevski ka qenë njëri ndër nënshkruesit e themelimit të Prokurorisë Speciale si institucion i pavarur, së bashku me 3 liderët tjerë të partive më të mëdha në Maqedoni. Andaj, këto akuza të tij duken të çuditshme ngaqë njëherë ka njohur legjitimitetin e tyre, madje duke i’u ofruar mbështetje të madhe për punën që po e bëjnë, ndërsa tani ka ndërruar kartën dhe i sulmon me akuza të drejtpërdrejta. /tesheshi.com/
