Pas ditësh heshtjeje, ish-kryemininistri maqedonas Nikola Gruevski u “përmend” në FB duke lajmëruar se Hungaria pranoi kërkesën e tij për azil.
Sot Hungaria, vend anëtar i BE-së dhe NATO-s, iu përgjigj pozitivisht kërkesës time për marrjen e azilit politik, për shkak të ndjekjes politike në Republikën e Maqedonisë. Në kërkesën kam theksuar se azilin e kërkoj për shkak të ndjekjes politike nga ana e qeverisë së re të udhëhequr nga LSDM-ja. Kam nënvizuar se qeveria dëshiron të më privojë nga liria duke shfrytëzuar hapa dhe metoda jodemokratike dhe duke keqpërdorur sistemin gjyqësor në Maqedoni. Unë nuk kam ikur nga drejtësia, por jam duke shfrytëzuar metodat ndërkombëtare të së drejtës. Vazhdoj ta kërkoj drejtësinë për veten dhe për të gjithë viktimat e tjera të ndjekjes politike në Republikën e Maqedonisë”, shkruan Gruevski.
Nga ana tjetër, Maqedonia dërgoi drejt autoriteteve hungareze, një kërkesë për ekstradimin e Gruevskit.
Në një deklaratë e Ministrisë së Drejtësisë në Shkup, thuhet se kërkesa për ekstradim ka të bëjë me ekzekutimin e vendimit të formës së prerë me burgim prej dy vjetësh dhe për vazhdimin e katër rasteve penale në pritje para gjykatave maqedonase.
Thuhet gjithashtu se Maqedonia është një vend i sigurt në të cilin nuk ka konflikt, ose ndërkombëtar ose të brendshëm, e cila do të rrezikonte jetën ose integritetin e çdo individi. /tesheshi.com/
