Nga Miradie Hasani
Pushimi dimëror për nxënësit e Maqedonisë u detyrua të shtyhet për një javë nga data e paraparë, 17 janari. Shkak ishte një grip i pazakontë i tipit kolerik, që mori dhe jetën e dy të vegjëlve, 3 dhe 4 vjeç, njëri në Kuçovë e tjetri në Gostivar
Të dhënat e fundit që shpalosi Instituti për Shëndet Publik ishin se në javën e parë të vitit 2017 u paraqitën në dyert e spitaleve mbi 8 mijë persona të prekur nga gripi.
Komisioni për sëmundje infektive që punon në kuadër të Ministrisë së Shëndetësisë në Maqedoni, mori vendim që të veprojë në lidhje me këtë virus duke dezinfektuar për një javë të gjitha shkollat dhe çerdhet e vendit.
“Të bëhet dezinfektim rrënjësor në të gjitha çerdhet e vendit nga ana e Qendrave për Shëndet Publik, të premten në orët e pasdites dhe të shtunën në orët paradites, kurse nëpër shkolla dezinfektimi të bëhet në kohën e pushimit dimëror, gjegjësisht para se të fillojë gjysmë vjetori i dytë. Ndërsa nëpër institucionet shëndetësore të kufizohet numri i vizitorëve për pacientët e hospitalizuar, me qëllim shmangies së kontakteve me persona të sëmurë, që do të ndikonte në përhapjen e gripit”, thuhej në kumtesën e Komisionit për Sëmundje Infektive.
Urdhëresën e zbatuan Qendrat e Shëndetit Publik që veprojnë nëpër tërë Maqedonisë. Ekipet dezinfektuese spërkatën shkollë më shkollë, duke kaluar çdo bankë, karrige, reze dere, dysheme, dhe çdo gjë tjetër qënxënësit mund të kenë kontakt.
Mirëpo shërbimet spërkatëse të Qendrës për Shëndet Publik thonë se materia dezinfektuese qëndron deri në momentin kur bëhet ndonjë pastrim tjetër nga mirëmbajtësit e shkollës që veprojnë me detergjente të thjeshta, e që spërkatësi i tyre do ta humb efektin e saj për çka është dedikuar.
“Po erdhën nxënësit në shkollë, është normale se ata lëvizin gjithkah dhe ecja e tyre nga jashtë brenda krijon papastërti me çka pastrueset e shkollës me doemos e kanë të pastrojnë me mjetet e tyre, dhe në këtë mënyrë efekti dezinfektues humbet”, thotë njëri prej ekipeve për dezinfektim.
Këtë të hënë rinis procesi mësimor dhe shpresohet që gripi, në atë përmasë të frikshme e kërcenuese që u shfaq, të mos jetë më i tillë. /tesheshi.com/
