Në përputhje me planin për zhvendosjen e refugjatëve nga Greqia për në vendet e tjera të BE-së, tridhjetë personat e parë azilkërkues janë ngjitur në avionin që do t’i çojë ata në Luksemburg.
Gjashtë familje nga Siria dhe Iraku janë fatlumët që nisin këtë plan zhvendosjeje. Kryeministri grek, Cipras, do ta përshkruante kështu këtë moment, “Tridhjetë përballë mijërave që kanë lënë shtëpitë në Siri dhe Irak janë një pikë ujë në oqean. Por ne shpresojmë se kjo do të bëhet një rrëke, e më pas një lumë humaniteti dhe përgjegjësie e ndarë, sepse këto janë parimet mbi të cilat u ndërtua Bashkimi Europian.”
Më shumë se 600.000 refugjatë kanë mbërritur në Greqi vetëm brenda këtij viti, me një pjesë dërrmuese të ardhur nga bregdeti turk. Qindra prej tyre kanë lënë jetën në Egje.
Programi i zhvendosjes ka për qëllim t’i transferojë 160.000 refugjatë nga vendet europiane më të prekura nga vërshimi i tyre drejt vendeve të tjera të BE-së.
I pranishëm në ceremoninë në aeroportin e Athinës, ministri i Jashtëm i Luksemburgut, Jean Asselborn, tha se gjesti simbolik i largimeve të së mërkurës ishte vetëm një start, por një start shumë i rëndësishëm. /tesheshi.com/
