Një shtetas shqiptar humbi jetën në orët e para të mëngjesit të sotshëm, pas një atentati që iu bë në një bar të zonës Glyfada në Athinë.
Mediat greke bëjnë të ditur se shqiptari është bashkëpronar i lokalit, ndërsa nuk bëjnë të ditur identitetin e tij.
Ngjarja ka ndodhur rreth orës 04:00 të mëngjesit, kur dy persona, që sipas dëshmitarëve okularë thanë se janë shtetas shqiptarë, qëlluan me armë kundër një grupi klientësh që ndodheshin në një prej tavolinave të një lokali në qendër te lagjjes rezidenciale të Athinës.
Policia greke thotë se dhe një person tjetër është plagosur dhe ndodhet në gjendje kritike për jetën. Gjithashtu, janë plagosur edhe dy shtetas grekë.
Të plagosurit u dërguan në spital ku ndodhen nën kujdesin e mjekëve.
Dy atentatorët mundën që të largohen nga zona me ndihmën e bashkëpunëtorëve të tyre që i prisnin jashtë klubit të natës.
Ende nuk dihet se kush janë autorët e ekzekutimit dhe arsyet e krimit, por burime policore thanë se dyshimet më të mëdha janë për pistën e larjes së hesapeve mes bandave mafioze që operojnë në kryeqytetin grek.
Një dëshmitar u tha agjentëve se autorët u kishin folur viktimave në shqip dhe më pas njëri prej tyre nxorri armën dhe qëlloi kundër grupit të të katërve që ndodheshin në të njëjtën tavolinë. /tesheshi.com/
