Qeveria e Greqisë ka rënë dakord për një program reformash dhe propozimet e saj për kreditorët ndërkombëtarë i dorëzon brenda natës së sotme, njoftoi ministri i Mbrojtjes së këtij vendit. Reformat mendohet se kanë të bëjnë me rritje të taksave dhe ndryshime të pensioneve.
Greqia duhet t’i dorëzonte brenda kësaj të enjteje propozimet e veta pasi vetëm kështu do të mund të siguronte një paketë të tretë ndihmash dhe të parandalonte një dalje të mundshme nga eurozona.
Propozimet e reja do të studiohen nga ministrat e Financave të eurozonës të shtunën dhe pritet që të mbahet një samit i liderëve të BE-së ditën e diel.
Ministri i Mbrojtjes, dhe lideri i partisë më të vogël të koalicionit qeverisës, Panos Kammenos nuk dha detaje të shumta për planin grek, por media raporton se reformat do të kalojnë për miratim në parlament të premten. /tesheshi/
