Policia greke arrestoi 4 persona, shqiptarë dhe bullgarë, që vepronin në kuadër të një grupi kriminal që merrej me trafikun e drogës.
Ata akuzohen nnga autoritetet se e merrnin drogën përmes kufirit me Shqipërinë dhe e trafikonin në zona të Greqisë së Veriut.
Pas arrestimeve, policia ka sekuestruar 35 kg kanabis.
Fillimisht janë arrestuar dy shtetasit shqiptarë, të moshës 35 dhe 33 vjeç, në momentin që po realizonin një shitje droge në një shesh të Seresit. Gjatë kontrollit të automjetit të tyre u gjet sasia prej 35 kliogramë kanabisi.
Ata kundërshtuan policinë në tentativë për tu larguar, por nuk i shpëtuan prangave.
Dy shtetasit bullgarë u arrestuan në afërsi të Katerinit.
Siç rezultoi nga hetimet, në orët e para të së martës 19 shtator, 35 vjeçari shqiptar që ishte dhe kreu i grupit, bashkë me dy shtetasit bullgarë, shkuan në afërsi të kufirit të gjelbër dhe morën 35 kilogramët e kanabisit, në një zonë të pambrojtur, ku i kishte fshehur 33 vjeçari, që i kishte sjellë më herët nga Shqipëria.
Përveç drogës, policia sekuestroi gjithashtu në cilësinë e provës tre automjete, si dhe tre telefona celularë që ata i përdornin për aktivitetin e tyre.
Të mërkurën në mesditë të katër u dërguan para prokurorisë së Seresit, ku iu komunikuan akuzat për transport dhe trafik droge. /tesheshi.com/
