Rihapet çështja e varrezave greke në Shqipëri, por kësaj radhe me një stil të ri.
Nuk ka një kërkesë formale të qeverisë së Athinës drejtuar asaj të Tiranës, por një letër të ushtarakëve grekë, normalisht të mbështetur nga qeveria greke.
Në një letër të “Shoqatës së të Afërmëve të të Rënëve të Eposit 1940-41”, kërkohet që të rihapet çështja e varrezave të ushtarëve grekë, çështje që trazoi politikën shqiptare gjatë viteve 2006-2010.
E firmosur nga dy figura të njohura, Georgios Sourllas dhe Aristidis Bouloukos, përkatësisht njëri ish-ministër, ish-nënkryetar parlamenti dhe tjetri ish-deputet, Gjenerel Leitnant në lirim.
“Me qëllim shmangien e keqinterpretimeve dhe konkluzioneve arbitrare, lutemi që të informoni popullin mik shqiptar se kërkesa jonë e vetme është që Qeveria Shqiptare të lejojë mbledhjen e eshtrave të të Afërmëve tanë që u vranë gjatë luftës Italo-Greke 1940 – 41 dhe të bëhet varrimi i tyre në Varreza Ushtrarake, ashtu siç parashikon Marrëveshja, pa asnjë detyrim financiar nga ana e Pales Shqiptare”.
Në vitin 2006, qeveria greke i kërkoi qeverisë së djahthtë të Sali Berishës të ndërtojë katër varreza të ushtarëve grekë në territorin e jugut të vendit dhe më pas të firmosë Marrëveshjen e Kufirit Detar.
Situata ndodhi në kohën kur Greqia po dobësohej nga kriza dhe Berisha uli influencën e biznesit grek në jug të vendit.
Tirana dhe Athina pas disa konsultimesh arritën që të bien dakord për të ngritur dy komplekse memorial, një në Gjirokastër, që ishte ndërtuar më pare, dhe një në Këlcyrë. Situata u acarua më shumë kur një prift në fshatin Kosinë të Përmetit u akuzua nga banorët se po blen eshtrat e banorëve për t`i emërtuar si ushtarë të vrarë gjatë luftës italo-greke. Kurrë nuk u ngrit një komision hetimor për këtë çështje, por Athina ndërhyri fuqishëm duke e cilësuar si një incident diplomatik.
Më pas kjo çështje sikur u ftoh dhe u hap vetëm nga qarqe ekstra politike siç janë Agimi i Artë në Greqi dhe Aleanca Kuqezi në Shqipëri.
Pas rrëzimit të Marrëveshjes së Ujrave, pra Paktit Detar, nga ana e Gjykatës Kushtetuese, qeveria e Athinës dhe e Tiranës hynë në një fazë mosbashkëpunimi, e cila zgjati deri më sot.
Deri para dy vjetësh, Athina ngrinte fort çështjen e varrezave në kancelaritë ndërkombëtare duke sulmuar Shqipërinë, por me shpërthimin e krizës ekonomike gjithçka ndryshoi kurs dhe axhenda e Greqisë ishte më shumë Trojkë dhe dalje nga euro.
Ndaj sot, dy ish-ushtarakë kanë marrë laps e letër dhe u kanë shkruar mediave një letër të hapur për ta bërë publike dhe për ta ngritur si çështje e zbatimit të marrëveshjes , pa zhurmë por me vendosmëri.
Bashkë me letrën ndodhet edhe marrëveshja e cila mban emrin e ish-zv/ministres së Mbrojtjes Zana Xhuka, dhe mban datën 9 shkurt 2009. /tesheshi.com/
