Ka ndërruar jetë ditën e djeshme, në moshën 96 vjeçare ish kancelari gjerman Helmut Schmidt. Lajmi është komunikuar nga mjeku personal i Schmidt. Kancelar gjerman në vitet 1974 deri më 1982, ai ishte operuar në fillim të shtatorit për shkak të një problemi në këmbë duke lënë më pas spitalin me dëshirën e tij, siç thanë edhe mjekët. Gjendja shëndetësore e Schmidt u përkeqësua gjatë orëve të fundit.
I operuar në shtator për shkak të një tromboze në këmbë, një ndërhyrje delikate që sanitarët e klinikës Asklepios-St.Georg e kanë kryer me shumë kujdes dhe me konsulta të njëpasnjëshme, por që nuk ka rezultuar tërësisht e suksesshme për ish kancelarin. Ai u largua nga instituti shëndetësor me vullnetin e tij të plotë.
Në një nga intervistat e fundit televizive, në kuadër të prezantimit të një prej librave të tij të fundit “Ajo që doja të thoja”, Schmidt është shprehur: “Nuk dua të shkoj 100 vjeç, por as nuk mund ta shmang këtë gjë”. Ish kancelari, zëri i së cilit nuk ka munguar në politikën e Gjermanisë gjatë këtyre viteve, duke marrë pjesë në debate publike me libra, fjalime dhe intervista në shtypin e shkruar dhe në televizion, është shprehur shpesh në lidhje me problemet shëndetësore, të krijuara si pasojë e moshës së thyer.
Schmidt u emërua kancelar menjëherë pas Willy Brandt. Ai mbajti këtë post dy mandate rresht, mes viteve 1974 deri më 1982. I adhuruar dhe shumë i respektuar në Gjermani, ku edhe sot e kësaj dite cilësohet si ‘Babai i Kombit”, ish kancelari shprehej me forcën e karizmës duke thënë: “Unë nuk dua të jem një shembull”./tesheshi.com/
