Policia e Shtetit dha shkurtimisht një njoftim për atentatin ndaj kryebashkiakut të Lushnjes Fatos Tushe, ku thuhet se ai u sulmua me granatë në zyrën e tij, ku mbeti e plagosur sekretarja Erisa Qalliu.
Tashmë është bërë e qartë se autori është është ish-shoferi i tij, shtetasi Gëzim Saraji, të cilin Tushe e kishte larguar kohë më parë, e që sipas disa të dhënave, njihej si përdorues droge.
“Sot, rreth orës 09:00, në zyrën e Kryetarit të Bashkisë Lushnjë, dyshohet se është hedhur një granatë dore dhe për pasojë është dëmtuar Kryetari i Bashkisë shtetasi F. T. dhe sekretarja e Bashkisë, shtetasja E. Q., të cilët ndodhen nën kujdesin e mjekëve.
Nga veprimet e para hetimore dyshohet se autor i kësaj ngjarjeje është ish-shoferi i Kryetarit të Bashkisë, shtetasi G. S., i cili pasi ka hedhur granatën është larguar menjëherë nga ambientet e Bashkisë Lushnjë.
Forca të shumta policie të Komisariatit të Policisë Lushnjë, të DVP Fier, Renea e FNSH e Fierit po krehin zonën, me qëllim kapjen dhe arrestimin e autorit.
Grupi i posaçëm hetimor, me Specialistë nga Departamenti i Policise Kriminale ne Policine e Shtetit dhe DVP Fier, nën drejtimin e Prokurorisë po punon për zbardhjen e plotë të ngjarjes”, njofton policia.
Ndërkohë, për gjendjen shëndetësore të sekretares, thuhet se ajo është jashtë rrezikut për jetën. /tesheshi.com/
