Gramozi, i biri i Fadil Vokrrit ka emocionuar të gjithë në fjalimin e shkurtër në mbledhjen komomerative për babain e tij. Ai ka thënë se Fadili nuk ka qenë vetëm i familjes por i të gjithëve.
“Është tepër vështirë ta përshkruaj babin tim. Besoj se vepra e tij flet vet. Andaj më lejoni t’ju falënderoj të gjithëve, për përkrahjen e vazhdueshme, se Fadil Vokrri nuk ishte vetëm i joni, por ishte i gjithë Kosovës. I qoftë i lehtë dheu i Kosovës!”, tha ai.
Edhe kryeministri Ramush Haradinaj tha se Fadil Vokrri ishte i të gjithëve.
“Nuk e di kush nuk ka qenë i afërt me të. Fadili ishte një sportist shpirtbardhë, i cili mërzitej nga lajmet e këqija për këdo qofshin, jo vetëm në sport, e i gëzohej lajmeve të mira për të gjithë”, tha Haradinaj.
Kurse kryekuvendari Kadri Veseli, tha se Fadili ishte sinonim i lajmeve të mira për Kosovën, sinonim i shpresave për një Kosovë që bënë historinë në fushën e gjelbër të sportit më të bukur në botë, futbollit.
“Para së gjithash, Fadil Vokrri ishte sinonim i një njeriu të ndershëm të Kosovës, andaj dhimbja për të është shumë e madhe”, tha ai.
Nga një fjalë rasti e mbajtën edhe kryetari i Komitetit Olimpik të Kosovës, Besim Hasani, sekretari i Federatës së Futbollit të Kosovës, Eroll Salihu, presidenti i Federatës Shqiptare të Futbollit, Armand Duka.
Të pranishëm në mbledhjen komemorative ishin edhe kryetari i Kuvendit të Republikës së Maqedonisë, Talat Xhaferi, përfaqësues të Federatës Shqiptare të Futbollit, përfaqësues të Federatës së Futbollit të Kosovës, përfaqësues të FIFA-s, kryetar të komunave dhe personalitete të tjera.
Varrimi i të ndjerit bëhet sot me nderime shtetërore në varrezat e Prishtinës, në ora 17:00. /tesheshi.com/
