Tirana zyrtare ka reaguar ashpër ndaj disa grafiteve anti-shqiptare në Institutin e Trashëgimisë Shqiptare në Shkup.
Në një deklaratë publike, Ministria për Europën dhe Punëve të Jashtme u kërkon zyrtarëve maqedonas qaë të zbardhin menjëherë ngjarjen dhe të ndëshkojnë fajtorët.
Ministria që drejton Bushati ka reaguar ashpër edhe për kërcënimin ndaj Talat Xhaferit në seancën e djeshme të Parlamentit të Maqedonisë.
Deklarata e Plotë:
“Kjo është hera e disatë që institucionet kulturore që ruajnë dhe pasqyrojnë historinë, traditat, gjuhën dhe kulturën shqiptare dhunohen qëllimisht e në mënyrë të papranueshme nga akte, të cilat kërkojnë të mbjellin urrejtje, përçarje e të nxisin tensione mes komuniteteve. Këto akte, pikërisht në momentet kur afrimi dhe kohezioni ndëretnik njeh hapa progresi drejt forcimit të mëtejshëm janë sulm i drejtpërdrejtë ndaj paqes, stabilitetit e harmonisë ndëretnike në vendin fqinj.
Besojmë se këto sulme janë veprime të një grupi të vogël njerëzish të nxitur nga ndjenjat nacionaliste ekstreme, si dhe veprimet obstruksioniste e retorika e dëmshme e ditëve të fundit nga segmente të politikës së vjetër pas miratimit të Ligjit për Përdorimin e Gjuhës Shqipe në Maqedoni.
Ministria për Evropën dhe Punët e Jashtme të Republikës së Shqipërisë u kërkon autoriteteve të Maqedonisë zbardhjen sa më shpejt të këtij akti vandal, hetimin dhe vënien para përgjegjësisë të autorëve të këtyre sulmeve, të cilat bien ndesh e cënojnë frymën e bashkëjetesës dhe harmonisë në Maqedoni e në gjithë rajonin’ thuhet në reagimin e Ministrisë së Jashtme. Ligji për gjuhën shqipe u miratua dje, ndërsa opozita nuk mori pjesë, madje tentoi që të bllokonte kalimin e ligjit”. /tesheshi.com/
