Grabitja e sotme në Rinas ka sjellë reagimin e kryetarit të PD-së, Lulzim Basha. Pas asaj që ka ndodhur këtë të enjte, Basha e ka quajtur situatën në vend si “rënie të rendit dhe shtetit”.
“Grabitja e armatosur sot në Rinas, në atë që duhej të ishte territori më i sigurtë në vend, dëshmon se rendi ka rënë, se shteti ka rënë. Persona me armatim të rëndë e më maska, shkojne deri tek pista e avionëve, grabisin paratë, vetëm një ditë pasi u deklarua se në aeroportin e Rinasit janë përforcuar kontrollet në kuadër të masave kundër terrorizmit, pas sulmeve në Stamboll”, deklaroi Basha, duke u futur më pas direkt në akuza për hir të të bërit politikë:
“Ku janë cubat e Tahirit, apo me siguri duke ruajtur parcelat me kanabis të Habilajve për llogari të shefit, duke kundruar udhëtimin e skafeve me drogë që kane pushtuar Jonin dhe Adriatikun, duke përgjuar në mënyrë të paligjshme e shantazhuar gjyqtarë e prokurorë, duke dhunuar e gjobitur qytetarë e biznesmenë apo duke arrestuar gra dhe pleq për kuponin e një kilogrami qepë, apo 2000 lekë drita të papaguara”.
Ndërkohë, disa orë nga grabitja dhe policia ende nuk ka rënë në gjurmë të autorëve. /tesheshi.com/
