Nga Mensur Krasniqi
Në kohën kur qindra refugjatë të lindjes janë ngujuar në kufirin greko-maqedonas, pasi që Maqedonia nuk po i lejon të hyjnë në këtë vend as edhe për tranzit, një grup refugjatësh nga Irani kanë gjetur mënyrën për të protestuar.
Këta të revoltuar meqë kanë mbetur në rrugë dhe shpallen si të padëshirueshëm nga shteti maqedonas, kanë qepur gojët e tyre dhe kanë filluar grevën e urisë.
Ata kanë qepur gojët e tyre me penj e gjilpëra dhe kësisoj kanë filluar grevën e urisë, në shenjë proteste për shkak të politikave të emigracionit që u ashpërsuan pas sulmeve terroriste në Paris, e që po i bllokojnë të gjithë emigrantët nga Siria, Iraku e Afganistani.
Iranianët, marokenët e pakistanezët janë ndër qindra refugjatët që po qëndrojnë përballë kordonëve të policisë dhe po provojnë t’i bllokojnë linjat e trenit ndërmjet Greqisë e Maqedonisë.
Së paku gjashtë iranianë kanë qepur gojët e tyre dhe kanë shkruar në fytyrë e trup fjalët “Iran” dhe “freedom – liri”.
Njëri nga refugjatët që i është bashkuar grevës së urisë, inxhinier elektrik, 34 vjeçar me emrin Hamid ka thënë se dëshiron të shkojë në cfarëdo vendi ku mund të jetë i lirë. “Nuk mund të kthehem. Do të më varin”, ka shtuar ai.
Me këtë situatë është i njoftuar edhe kryetari i organizatës joqeveritare për ndihmën e refugjatëve “Legis”, Jasmin Rexhepi. Ai për portalin tesheshi.com sqaroi arsyet dhe mënyrën e protestës së refugjatëve iranianë.
“Bëhet fjalë për mijëra protestues që ndodhen në vendkalimin kufitar ndërmjet Greqisë dhe Maqedonisë, të cilët Maqedonia nuk i pranon as si tranzit në Maqedoni. Sigurisht që edhe Maqedonia nuk po lejon hyrjen e tyre në shtet, ashtu sikurse po bëjnë Serbia dhe shumica e shteteve tjera të Bashkimit Europian. Mirëpo tani kam informata se të njëjtit janë strehuar në disa shatore nga ana e shtetit grek, dhe për momentin u është siguruar ushqimi. Për më tutje do të shohim se çfarë do ndodh”, deklaroi Jasmin Rexhepi.
I pyetur për mënyrën e protestimit me shpuarje të trupit me gjilpëra, nëse kjo metodë është e njohur nga aspekti fetar, Rexhepi shtoi: “ Është evidente se vetëm sekti i shiiave e bën një gjë të tillë, për dallim prej sunitëve që nuk shfrytëzojnë atë metodë të protestimit. Kjo është edhe më e besueshme kur e dijmë që bëhe fjalë për iranianë, ku pjesa më e madhe e popullsisë i përkasin sektit të shiiave”, përfundoi Rexhepi.
Gjendja e refugjatëve është rënduar me kontrollet e ashpra që po u bëhen nëpër kufij pas sulmeve terroriste që pretendohet ta kishin kryer ISIS-i në Paris ku mbetën të vrarë 127 persona. Njëri nga sulmuesit ishte identifikuar që ka hyrë në Francë si refugjat. /tesheshi.com/
