Gjykatësi federal Theodore Chuang ka lëshuar një vendim ku thuhet se Elon Musk dhe Departamenti i tij i Efikasitetit të Qeverisë (DOGE) ka të ngjarë të kenë përdorur fuqi antikushtetuese në një përpjekje për të shpërbërë Agjencinë e SHBA për Zhvillim Ndërkombëtar (USAID).
Vendimi, i cili u mor në favor të 26 punonjësve aktualë dhe ish-punonjësve të USAID-it, kërkon të “shtyjë mbylljen e parakohshme, përfundimtare” të agjencisë ndërkohë që procesi gjyqësor është në vazhdim.
Gjykata urdhëroi DOGE që të rivendoste aksesin në e-mail dhe sistemet kompjuterike për punonjësit aktualë të USAID-it dhe bllokoi personelin e DOGE nga ndërmarrja e çfarëdo veprimi në lidhje me agjencinë pa lejen e shprehur të zyrtarëve të autorizuar të USAID-it.
Gjykatësi urdhëroi gjithashtu që punonjësit e USAID-it të lejohen të kthehen në zyrat federale nga të cilat u dëbuan muajin e kaluar dhe e ndaloi ekipin e Musk të ndërmarrë çdo veprim të mëtejshëm në lidhje me mbylljen e USAID-it.
Zëvendës zëdhënësja e Shtëpisë së Bardhë Anna Kelly tha se administrata do të apelojë vendimin, duke e quajtur atë të gabuar. “Gjyqtarët mashtrues po minojnë vullnetin e popullit amerikan në përpjekjet e tyre për të penguar Presidentin Trump të zbatojë axhendën e tij,” tha Kelly.
Nga ana tjetër, avokatët përfaqësues të USAID-it vlerësuan vendimin, duke theksuar se ky është një hap i rëndësishëm në luftimin e sulmeve të Musk ndaj USAID-it, qeverisë amerikane dhe Kushtetutës. “Ky vendim përfaqëson një fitore të rëndësishme në luftën kundër sulmeve ndaj stabilitetit të qeverisë së Shteteve të Bashkuara,” thanë avokatët. /tesheshi.com/
