Më 17 shtator dy qen pitbull sulmuan një foshnje 13 muajshe, e cila humbi jetën. Ngjarja tragjike ndodhi në Breshia të Italisë, ku foshnja ishte në banesë bashkë me gjyshin e saj.
Ky i fundit morri plagë të rënda dhe u shtrua në spital, ndërkohë që gjendja e tij ishte e rëndë.
Tashmë ai ka folur për ngjarjen para hetuesve, duke dhënë versionin që foshnjen e kishte në krah dhe qentë e kishin sulmuar. Por duket se ky version nuk i ka bindur hetuesit, që mendojnë se fëmija 13 muajsh ishte ulur poshtë dhe gjyshi i saj e kishte lënë pa vëmëndje ndonjë moment, që përkon me sulmin e dy qenve pitbull mbi të.
Sipas mediave italiane, gjyshi është një ndër personat e hetuar për vdekjen e vajzës. Ndërkohë prindërit e vajzës, babai shqiptar dhe nëna italiane ende nuk kanë dhënë dëshminë e tyre në gjyq. Ata janë pronarët të qenve, dhe do të shihet nëse kafshët kanë qenë më herët me probleme, nëse ka pasur sulme të mundshme në lagje ndaj qenve të tjerë apo fqinjëve, etj.
Ata janë në gjendje mjaft të rënduar psikologjike pasi dhimbja e tyre për humbjen e vogëlushes Victoria është ende e freskët dhe për këtë arsye ata nuk janë në gjendje për të dëshmuar.
Në hetim është edhe veterineri, i cili nuk kishte raportuar tek autoritetet një sulm të mëparshëm të dy pitbullëve kundër një qeni tjetër.
Pitbullët u vranë nga policia, e cila ishte njoftuar për ngjarjen nga fqinjët. /tesheshi.com/
