Pikërisht në natën e 22 Majit, kur deputetët e Kuvendit të Shqipërisë me një votim historik i hapën rrugën Vetingut në drejtësi, disa gjyqtarë shqiptarë po përpilonin pa zhurmë një akt-padi kundër Vettingut.
Shoqata dhe Unioni i Gjyqtarëve kanë bashkuar forcat dhe më 25 maj kanë ankimuar në Gjykatën Kushtetuese ligjin për organet e qeverisjes së sistemit të drejtësisë.
Gjyqtarët, të cilët janë të parët që priten të preken nga fshesa e pastrimit të drejtësisë nga korrupsioni, kanë argumentuar në gjykatëse se ky ligj bie ndesh me Kushtetutën e vendit.
Konkretisht, ata kërkojnë shfuqizimin e nenit 7, pika A dhe C, ku përcaktohet se gjyqtarët në kohën e kandidimit për Këshillin e Lartë Gjyqësor duhet të kenë ushtruar funksionin e gjyqtarit për të paktën dhjetë vjet dhe të jenë të vlerësuar “shumë mirë” në dy vlerësimet e fundit të performancës etike dhe profesionale.
Po ashtu ata kërkojnë shfuqizimin e pikës 1 të nenit 59, ku thuhet se kryetari dhe zv.kryetari i Këshillit të Lartë Gjyqësor zgjidhen në mbledhjen e parë të KLGJ-së nga radhët e anëtarëve që nuk janë gjyqtarë dhe me shumicën e thjeshtë të votave të anëtarëve. Këtu, gjyqtarët kërkojnë që të hiqet fjala “zëvendëskryetari”.
Ky është ankimimi i katërt që vjen në adresë të Gjykatës Kushtetuese për ligjet e reformës në drejtësi pas ligjit të Vettingut dhe ligjit për statusin e gjyqtarëve dhe prokurorëve.
Më parë edhe Partia Demokratike ankimoi disa ligje, por kërkesa u rrëzua./tesheshi.com/
