Gjykata Ndërkombëtare e Drejtësisë (ICJ) njoftoi se në fund të gushtit do të nisë shqyrtimin e ankesës së Iranit kundër Shteteve të Bashkuara, për shkak të rivendosjes së sanksioneve ekonomike.
“Gjykata Ndërkombëtare e Drejtësisë, organi kryesor gjyqësor i OKB-së, do të mbajë dëgjime publike me pretendimet iraniane”, u tha në një deklaratë nga Haga.
Më 16 korrik Irani paraqiti një ankesë ku tha se qëllimi i padisë ishte që SHBA të japin llogari “për paligjshmërinë e ri-futjes së sanksioneve të njëanshme”.
Autoritetet iraniane kanë thënë se padia i referohet shkeljeve amerikane të detyrimeve ndërkombëtare, veçanërisht sipas marrëveshjes së miqësisë amerikano-iraniane të vitit 1955.
Kjo marrëveshje u përmend në disa raste më parë në mosmarrëveshjet midis Teheranit dhe Uashingtonit para kasaj gjykate.
Irani dhe Shtetet e Bashkuara nuk kanë marrëdhënie diplomatike që nga viti 1980.
Presidenti Donald Trump tha më 8 maj të këtij viti se vendi i tij është tërhequr nga marrëveshja bërthamore me Iranin, arritur nën administratën Obama mes gjashtë fuqive të mëdha – SHBA-së, Rusisë, Kinës, Britanisë, Francës dhe Gjermanisë.
Përveç tërheqjes nga marrëveshja, Trump gjithashtu njoftoi ri-vendosjen e sanksioneve kundër Iranit. /tesheshi.com/
