Agjencia e lajmeve AFP njofton se një gjykatë ushtarake libaneze e ka dënuar me 13 vite burg, me punë të rëndë, ish-ministrin e Informacionit, Michel Samaha, për përpjekjet për të kryer akte terroriste.
Ish-ministri u gjet fajtor për transportim të lëndëve shpërthyese për të kryer sulme dhe vrasje të figurave politike e fetare në vendin e tij me ndihmën e shërbimeve sekrete siriane.
Prokuroria ka kërkuar dënim me vdekje për të, i ka thënë një burim i gjykatës AFP-së, por ai u dënua me 13 vite burg me punë të rëndë.
Një vit burg është i barabartë në Liban me nëntë muaj të një viti kalendarik, kështu që dënimi i i vërtetë i Michel Samaha-së është rreth 10 vite burg.
Ish-ministri qe arrestuar në 2012-ën, e qe dënuar në maj të 2015-ës me katër vite e gjysmë burg, por ky vendim do të shfuqizohej një muaj më vonë dhe do të urdhërohej rigjykimi.
Një ish-këshilltar i presidentit sirian Beshar Esad, ish-ministri e pati pranuar gjatë gjykimit të parë se kishte transportuar lëndë shpërthyese nga Siria për të kryer sulme në Liban.
Ish-kryeministri i vendit, Saad el-Hariri, shprehu kënaqësinë e vet për ridënimin e ish-ministrit, duke shkruar në faqen e tij elektronike në një rrjet social: “Terroristi Samaha u kthye sot te vendi i tij i ligjshëm, në burg, për komplotim për të vrarë qytetarë të pafajshëm…” /tesheshi.com/
