Nga Blendi Gashi
Se koalicioni PDK-LDK është prej zorri, pra një tip “martese” si ato për hir të dokumentave në emigrim, por dhe e detyruar nga faktori ndërkombëtar, kjo është çështje e ditur për opinion publik kosovar.
Është konfirmuar kjo së fundi dhe nga Komisioni Evropian përmes raportit të fundit të ashtuquajtur i Progresit, ku thuhet “se ka mungesë bashkëpunimi mes ministrave të PDK-së dhe LDK-së, pasi ata nuk mund ta shohin njëri-tjetrin me sy.”
Treguesi më i mirë i kësaj është mosvotimi i anëtarëve për Organin Shqyrtues të Prokurimit (OSHP), apo siç njihet ndryshe si “gjykata’ e tenderave nga Lidhja Demokratike e Kosovës”.
Siç dihet, të dyja partitë në bashkëqeverisje tentojnë të kenë njerëzit e tyre në këtë institucion dhe më pas të shpërblejnë veten me miliona euro përmes dhënies së tenderae për militantët e tyre.
Janë pikërisht milionat që PDK-në dhe LDK-në i bëjnë bashkë por edhe i ndajnë.
“Gjykata e tenderave” vuri në pah mospajtimin mes dy partive qeverisëse, konkretisht shkaktoi përplasje në kabinetin qeveritar “Mustafa”.
Edhe vizat…
Është pikërisht kryeministri Isa Mustafa dhe ministri i Integrimeve Bekim Çollaku, që pas dështimit të votimit të anëtarëve të OSHP-së dolën me deklarata kundërthënëse dhe mospajtuese rreth asaj se sa do të ndikojë kjo çështje në liberalizimin e vizave për vendin.
Përderisa kreu i ekzekutivit kosovar, Mustafa deklaroi se mosvotimi i anëtarëve të OSHP-së nuk rrezikon liberalizimin e vizave, krejt ndryshe mendon ministri i tij nga PDK.
“Nuk ka asnjë arsye të rrezikohet liberalizimi, pasiqë ne i kemi plotësuar të gjitha kriteret e OSHP-së dhe kriteret e prokurimit. Ne, vitin e kaluar, kemi kaluar komisionin rregullativ të prokurimit publik. Kemi ndryshuar ligjin mbi prokurimin publik; nga ky vit kemi kaluar në prokurimin elektronik; po ashtu kemi përcaktuar fazat e zbatimit të prokurimit elektronik gjatë këtij viti në të gjitha agjencitë qendrore, derisa, në vitin e ardhshëm, prokurimin elektronik do ta bëjmë edhe në pushtetin lokal”, ka thënë Mustafa, pas një vizite që ka bërë në fabrikën e pijeve Frutex në Suharekë.
Por për dallim nga shefi i tij, ministri i integrimeve evropiane, Bekim Çollaku në një deklarim dhënë për mediat ka thënë se emërimi i anëtarëve dhe funksionalizimi i Organit Shqyrtues të Prokurimit Publik ka qenë kriteri i fundit i mbetur në kuadër të procesit të liberalizimit të vizave.
“Me gjithë respektin dhe mirëkuptimin për pavarësinë dhe vullnetin e deputetëve për vendimmarrje sipas përcaktimit të tyre, dështimi për të funksionalizuar Organin Shqyrtues të Prokurimit Publik vetëm dy ditë para ardhjes së misionit vlerësues të ekspertëve të Bashkimit Evropian, rrezikon të ndikojë negativisht në raportin vlerësues të këtij misioni”, tha Çollaku, i cili shpreson që ky kriter për liberalizimin e vizave të përmbushet sa më shpejt.
Ndryshe, kryeminsitri Mustafa dhe ministri Çollaku edhe vitin e kaluar kishin dhënë deklarata kundërthënëse pikërisht për atë se kur mund të ndodh liberalizimi i vizave për kosovarët.
Ndërsa Mustafa tha se lëvizja e lirë e qytetarëve do të ndodh brenda vitit 2015, gjë që nuk ndodhi, ministri Çollaku tha nga ana e tij se nuk dëshiron të përfshihet në afatet se kur mund të ketë lëvizje në këtë drejtim.
Mbetet të shihet nëse këtë vit do t’iu hiqen vizat kosovarëve, premtim ky i dhënë nga qeveria aktuale, apo sërish kosovarët do të mbeten qytetarë të izoluar. /tesheshi.com/
