Arrest me burg është masa e sigurisë e dhënë nga Gjykata e Lartë për deputetin Mark Frroku lidhur me akuzat për vrasje e shfrytëzim prostitucioni që vijnë nga Belgjika, dhe të fshehjes së pasurisë nga autoritetet shqiptare.
Pas rreth 3 orë e gjysmë seancë me dyer të mbyllura, pesëshja e trupit gjykues me Relator Artan Broci dhe anëtarët Ardian Nuni, Edmond Islamaj, Guxim Zenelaj dhe Tom Ndreca ka pranuar kërkesën e Prokurorisë duke vendosur të lërë në qeli deputetin kristiandemokrat.
Ai u paraqit sot rreth orës 12:30, përpara fillimit të seancës në Gjykatën e Lartë i prangosur dhe i shoqëruar nga forcat e policisë ku u transportua nga Drejtoria e Policisë. Mark Frroku është i akuzuar për kryerjen e 6 veprave penale mes të cilave edhe atë të vrasjes së shqiptarit Aleksandër Kurti në 1999 në Bruksel. Po nga Belgjika, Frroku akuzohet edhe për shfrytëzim prostitucioni. Ndërsa autoritetet shqiptare, në bazë edhe të kallëzimit të ILDKP-së ditën e djeshme e akuzojnë deputetin për deklarim të rremë dhe fshehje pasurie.
Akuzat nga Belgjika:
Vrasje e shqiptarit Aleksandër Kurti në Bruksel në 1999
Shfrytëzim prostitucioni
Akuzat nga Shqipëria:
Refuzim për deklarim pasurie
Deklarim i rremë pasurie
Fshehje pasurie”
Pastrim i produkteve të veprës penale.
Një ditë më parë, Kuvendi i Shqipërisë miratoi me 113 vota pro kërkesën e Prokurori për autorizimin e arrestimit të tij.
