Gjermania dhe Britania njoftuan të premten se vazhdojnë të mbështesin Gjykatën Penale Ndërkombëtare (ICC) pasi ajo u bë shënjestër e sanksioneve nga administrata e presidentit amerikan Donald Trump, masa e të cilit bëri që kryeministri hungarez Viktor Orban të rishqyrtojë anëtarësimin e vendit të tij në këtë gjykatë, transmeton Reuters.
Berlini zyrtar do të vazhdojë të mbështesë ICC-në, megjithëse nuk është e qartë se çfarë do të nënkuptojnë sanksionet e presidentit amerikan Trump për gjykatën, tha të premten një zëdhënës i Ministrisë së Jashtme gjermane.
“Unë nuk do të habitesha plotësisht nëse disa shtete do të mblidheshin sot në Nju Jork dhe do ta bënin këtë (mbështetjen e tyre) publike edhe një herë,” shtoi zëdhënësi.
Kancelari gjerman Olaf Scholz tha të premten se Trump kishte gabuar kur vendosi sanksione ndaj Gjykatës Ndërkombëtare Penale sepse rrezikonte një institucion të rëndësishëm.
“Sanksionet janë mjeti i gabuar. Ato kërcënojnë një institucion që supozohet të sigurojë që diktatorët e kësaj bote thjesht nuk mund të persekutojnë njerëzit dhe të fillojnë luftëra, dhe kjo është shumë e rëndësishme,” tha Scholz.
Holandës i vjen keq për sanksionet
Mbretëria e Bashkuar mbështet pavarësinë e ICC dhe nuk ka plane të sanksionojë zyrtarët e saj, tha të premten një zëdhënës i kryeministrit Keir Starmer.
Zëdhënësi u pyet për Gjykatën pasi Trump miratoi sanksione ekonomike dhe udhëtimi ndaj zyrtarëve të ICC-së që punojnë në hetime kundër qytetarëve amerikanë ose aleatëve si Izraeli.
“Kjo është një çështje e SHBA,” u tha zëdhënësi gazetarëve. “Sa i përket Mbretërisë së Bashkuar, ne mbështesim pavarësinë e gjykatës dhe nuk kemi plane për të sanksionuar zyrtarë individualë të saj,” shtoi ai.
Holanda, mikpritëse e gjykatës me bazë në Hagë, tha gjithashtu se i vjen keq për sanksionet.
Komisioneri i Lartë i OKB-së për të Drejtat e Njeriut u bëri thirrje të premten Shteteve të Bashkuara të “tërheqin” sanksionet kundër Gjykatës Penale Ndërkombëtare.
“Ne kemi keqardhje të thellë për sanksionet individuale të shpallura dje kundër stafit të Gjykatës dhe kërkojmë nga Shtetet e Bashkuara që të anulojnë këtë masë”, tha zëdhënësja Ravina Shamdasani për AFP, duke shtuar: “Ne mbështesim plotësisht punën e pavarur të Gjykatës”.
Gjykata: Ne vazhdojmë të japim drejtësi
Zëdhënësja e Komisionerit të Lartë të OKB-së për të Drejtat e Njeriut tha se ICC “duhet të jetë në gjendje të kryejë plotësisht punën e saj të pavarur – aty ku një shtet nuk dëshiron ose në të vërtetë nuk është në gjendje të hetojë ose ndjekë penalisht, siç thuhet në Statutin e Romës”.
“Gjykata është një pjesë thelbësore e infrastrukturës së të drejtave të njeriut,” shtoi ajo.
Vetë ICC-ja dënoi sanksionet dhe njoftoi se “qëndron fort me stafin e saj dhe zotohet të vazhdojë të ofrojë drejtësi dhe shpresë për miliona viktima të pafajshme të krimeve në mbarë botën, në të gjitha situatat”.
Megjithatë, kryeministri hungarez Viktor Orban, një aleat i vendosur i Trump, tha se sanksionet treguan se mund të jetë koha që Hungaria të largohet nga ICC-ja.
“Është koha që Hungaria të rishqyrtojë atë që po bëjmë në një organizatë ndërkombëtare që është nën sanksionet e SHBA! Në politikën ndërkombëtare po fryjnë erëra të reja. Ne i quajmë ato Trump-tornado,” njoftoi Orban në X.
Urdhri ekzekutiv i Trump
Trump nënshkroi një urdhër ekzekutiv që ndalon hyrjen e udhëheqësve, punonjësve dhe agjentëve të ICC në Shtetet e Bashkuara.
Sipas një deklarate të Shtëpisë së Bardhë të enjten, gjykata “ndërmori veprime të paligjshme dhe të pabaza kundër Amerikës dhe aleatit tonë të ngushtë Izraelit”, duke cituar hetimet e ICC-së për krimet e dyshuara të luftës nga ushtarët amerikanë në Afganistan dhe ushtria izraelite në Rripin e Gazës.
Zëdhënësi i Komisionerit të Lartë të OKB-së për të Drejtat e Njeriut kujtoi se “ICC-ja, e cila gëzon mbështetjen e dy të tretave të shteteve të botës, është një institucion qendror në sistemin ndërkombëtar të drejtësisë penale” që është “thelbësore për garantimin e drejtësisë” dhe për të siguruar që autorët e “krimeve më të rënda të mbahen përgjegjës për veprimet e tyre, pavarësisht nëse ata janë kryer në territorin e shtetit, pa marrë parasysh se a kanë qenë në vend tjetër.” /tesheshi.com/
