Një ditë më parë në sallën e Kuvendit, pozita dhe opozita shkëmbyen akuza të ndërsjellëta për lidhjet e politikës me krimin, madje duke publikuar edhe një seri fotosh që tregonin persona të ndryshëm të dënuar në krah të politikanëve.
Fillimisht kreu demokrat, Lulzim Basha, publikoi një foto ku shfaqej i arrestuari i ditëve të fundit Durim Keçi duke darkuar me ministrin Blendi Klosi.
Por i menjëhershëm ishte reagimi i kryeministrit Edi Rama që publikoi një tjetër foto ku shfaqej i njëjti person në “çadrën e lirisë” të ngritur nga PD përpara Kryeministrisë disa muaj më parë.
Sot Durim Keçi, nën masa të forta sigurie ka dalë para gjykatës së Durrësit, e cila ka vlerësuar masën e arrestit.
Keçi, u arrestua për llogari të shtetit italian. Burimet bëjnë të ditur se prokuroria kërkoi në nisje të seancës që gjykata të konsideronte të ligjshëm arrestimin, duke lënë në burg Keçin deri në ekstradimin e tij drejt Italisë. Në anën tjetër mbrojtja vuri në dyshim shkresën e Interpolit me pretendimin se ajo nuk ka vulën e autoriteteve italiane.
Por, gjykata vendosi masën e arrestit me burg për efekt ekstradimi në Itali, aty ku Keçi rezulton i dënuar me 6 vite burg për trafik droge dhe shfrytëzim prostitucioni. /tesheshi.com/
