Kompanitë në Bashkimin Evropian mund të ndalojnë shamitë përderisa është një ndalim i përgjithshëm që nuk diskriminon punonjëset femra, njoftoi gjykata më e lartë e Evropës në vendimin e fundit për një çështje që ka ndarë Evropën prej vitesh.
Rasti ka të bëjë me një grua muslimane, së cilës iu tha se nuk mund të mbulonte kokën kur aplikonte për një stazh gjashtë-javor në një kompani belge.
Kompania tha se ata kanë një politikë neutraliteti, që do të thotë se asnjë mbulesë e kokës, qoftë kapele apo shall, nuk lejohet në ambientet e tyre.
Gruaja iu drejtua gjykatës belge, e cila kërkoi këshilla nga Gjykata e BE-së.
“Nuk përbën diskriminim të drejtpërdrejtë”
Gjykata e BE-së me qendër në Luksemburg tha se nuk duhet të ketë diskriminim të drejtpërdrejtë në një ndalim të tillë.
“Një rregull i brendshëm i kompanisë që ndalon veshjen e dukshme të simboleve fetare, filozofike ose shpirtërore nuk përbën diskriminim të drejtpërdrejtë nëse zbatohet për të gjithë punëtorët në një mënyrë të përgjithshme dhe të padiferencuar,” thanë gjyqtarët.
Vitin e kaluar, gjykata e BE-së tha se kompanitë nga Unioni mund t’i ndalojnë punonjëset femra të mbajnë shami nën kushte të caktuara, nëse ato duhet ta bëjnë këtë në mënyrë që të projektojnë një imazh neutraliteti tek klientët.
Në Gjermani, ndalimi i shamisë për gratë në punë është debatuar prej vitesh, kryesisht në lidhje me mësuesit e shkollave publike dhe praktikantet gjyqësore.
Franca, shtëpia e pakicës më të madhe muslimane në Evropë, ndaloi shamitë në shkollat publike në vitin 2004. /tesheshi.com/
