Qeveria serbe do të paraqesë një kërkesë zyrtare kundër kthimit të Forcave të Armatosura të Kosovës, në një ushtri të mirëfilltë kombëtare,.
Këtë e ka bërë të ditur zyrtari i beogradit, i ngarkuar për Kosovën Marko Gjuriq, në një intervistë televizive.
Gjuriq, ka përdorur një diversion ku kërcënon edhe Prishtinën për destabilitet.
Sipas tij, themelimi i Forcave të Armatosura të Kosovës mund të jetë një kërcënim për stabilitetin dhe të ardhmen paqësore të serbëve dhe shqiptarëve.
“Sa i përket qëndrimit të Qeverisë së Serbisë është e qartë se – në bazë të marrëveshjes ushtarako-teknike të Kumanovës, e qershorit të vitit 1999 në mes të ushtrisë jugosllave dhe të NATO-s, përkatësisht KFOR-it, forcë e vetme ligjore e armatosur në territorin e Kosovës (Kosovës dhe Metohisë, siç ne themi) është KFOR.
Ne mendojmë se çdo militarizimi i ri në rajon, që ka vuajtur aq shumë për shkak të luftrave, mund të jetë vetëm një kërcënim për stabilitetin dhe të ardhmen paqësore të serbëve dhe shqiptarëve, të cilën ne të gjithë e duam”, tha Marko Gjuriq.
Por, në Qeverinë e Kosovës shprehen se themelimi i Forcave të Armatosura të Kosovës është shumë i rëndësishëm për stabilitetin dhe paqen në rajon.
“Ushtria e Kosovës do të formohet së shpejti,” është shprehur ministrja për dialog Edita Tahiri.
Përfaqësues të opozitës në Kosovë, pretendojnë se themelimi i forcës mund të kryhet vetëm nëse bëhen pazare të reja me Qeverinë e Serbisë.
Por, këtë e mohon ministrja për dialog, Edita Tahiri, si kryenegociatore e nivelit teknik të bisedimeve me Serbinë, në Bruksel.
/tesheshi.com/
