Bashkia e Tiranës përshëndeti vendimin e gjykatës Administrative për gjobitje të PD-së për ndotje të mjedisit, rrugëve dhe trotuareve të qytetit gjatë protestës së thirrur prej saj në 8 dhjetor 2015. Sipas Bashkisë, Gjykata me këtë vendim vendosi një precedent të penaliteteve ndaj një subjekti politik që ndot hapësirën publike.
Kështu, Bashkia jo vetëm pretendon se ka marrë drejtësi nga gjykata, por thotë se do të apelojë edhe pikat e tjera të gjobës, duke ndjekur të gjitha rrugët ligjore, derisa Partia Demokratike t’u paguajë qytetarëve çdo qindarkë për shkatërrimin dhe vandalizimin që, sipas saj, i bënë qytetit të Tiranës në të njëjtën protestë.
Por, partia Demokratike nga ana e saj, reagoi pas Bashkisë duke deklaruar se pretendimi i Veliajt se ka fituar gjyqin me PD është një riciklim mbetjesh e mashtrimesh të ulëta.
“Sot, Gjykata Administrative vendosi shfuqizimin e të 7 akteve të Erion Veliajt, pra shfuqizoi pretendimet e tij sikur protesta popullore kishte shkaktuar 172 milionë lekë dëme në qytet. Gjykata e gjeti të paligjshëm dhe të pabazuar në prova, pretendimin e Veliajt, të bërë edhe publik me njoftimin që bëri me 8 DhJetor 2015, ku ai kakariste se do ta detyronte PD-në të paguante çdo qindarkë. Në këtë mënyrë gjykata pranoi argumentimin e përfaqësuesve të PD se “dëmet”, ishin fryt i fantazisë së kryetarit të Bashkisë Tiranë dhe se ato nuk kishin ndodhur në të vërtetë”, deklaron selia blu.
Edhe PD ka pretendimet e saj për vendimin e gjykatës, pasi thekson se gjoba që Veliaj i vendosi protestës popullore, ishte një falsifikim i pastër, shkelje e rëndë ligjore, për të cilën ai duhet të ndiqet penalisht, pas kallëzimit që ka bërë polici bashkiak, të cilit iu fallsifikua firma. /tesheshi.com/
