Nga Ahmet Zani
Kur e sheh ashtu Gjin Bocin duke u marrë më këpucët ndër duart, të duket se asgjë tjetër nuk fshihet tek ky njeri veç atij të këpucarit,zanat me të cilin ushqehet e mban familjen prej vitesh.
Në Mamurras njihet si më adapti për t’i risjellë këpucët në terezi kur ato shqyhen, pr dhe vetë ai ka kaluar një fat këpuce.
Ai ka pas vuajtur disi nga një sëmundje mendore, por ajo që i ndodhi në vitin 1974 do ishte një fatkeqësi plus në mangësinë e tij mentale. Ai arestohet nga organet e sigurimit të Krujës, duke qenë krejt n’hall t’vet, me një gjysëm mendje, duke u akuzuar si agjent i shërbimeve të huaja, ku veçohej UDB-ja jugosllave. E fusin Gjinin e gjorë në një botë pa asnjë kordinate për mendjen e tij të mangët, ku siç kjo e fundit u dukej hetuesve si një lojë djallëzore prapa së cilës fshihet një agjent i regjur me inteligjencë maksimale. Dhe nisin më pas torturat, për t’i nxjerrë Gjinit sekretet që fshihte në gji, e që kishin për qëllim përmbysjen e pushtetit popullor. Ai thotë se deri para pak vitesh i kishte ende në duar shenjat e prangave.
Meseleja nuk do vazhdonte shumë në fakt, pasi ka qenë një kuadër policor i kohës që ka ndërhyrë për ta liruar armikun fals. Bëhet fjalë për ish-të plotfuqishmin e zonës së Mamurrasit që iu referon strukturave të hetuesisë se Gjin Boci nuk i përket ndonjë agjenture të huaj, siç ata ishin informuar; porse ata që e kishin sjellë aty, thjesht kishin dashur të përligjnin punën e tyre, medemek vigjilente, duke viktimizuar një të gjorë që për më tepër merrte dhe ilaçe për sëmundjen mendore që kishte. Pas disa kohësh në hetuesi, ashtu, si një këpucë e lodhur, e dërgojnë në spitalin psikiatrik në Tiranë, derisa sa arrin të rehabilitohet deri diku, aq sa për të punuar e jetuar i lidhur pas bukës së gojës.
Gjini është mishërimi në realitet i atij skeçit të Estradës së Tiranës vite më parë, “Revolveri”, ku partia e kërkonte tek ca fshatarë të gjorë revolverin e humbur të heroit që nuk gjendej në stendat e muzeut. Fshatarët zhdëpeshin paq nga Dordomuzi duke u detyruar të sajonin lloj-lloj gënjeshtrash me pranim faji, ndërsa Gjini këpucari as sajesa nuk ka mundur të bëj i gjori. Sot ai jeton duke rregulluar këpucë, gjëja më e mirë që mund të bëjë në jetë, për të qenë i nderuar dhe i respektuar, siç dhe është. /tesheshi.com/
