Nxënës tw shkollës së Mesme të Përgjithshme “28 Nëntori” të qytetit të Shkodrës, morën iniciativën për të grumbulluar një sasi librash dhe për t’ua dhuruar të miturve me liri të kufizuar. Nisma e veçantë, e cila angazhoi çdo nxënës në dhurimin e disa librave nga bibliotekat e tyre personale, bëri që në fund të saj të mblidheshin plot 500 tituj me tematikë për moshat e reja. I gjithë fondi iu dorëzua Drejtorit të Institucionit të të Miturve Kavajë, Përparim Daiut, i cili mori pjesë në ceremoni dhe falenderoi drejtorin dhe nxënësit e shkollës për gjestin e tyre human dhe domethënës.
“Shkodra si djep i kulturës, i artit dhe i sportit tregoi edhe njëherë vlera të veçanta me anë të këtij gjesti. I falenderoj këta të rinj për dhurimin e librave, për vullnetin dhe dëshirën e mirë që kanë për të ndihmuar bashkëmoshatarët e tyre, të cilët sot janë duke vuajtur një gabim që i ka privuar nga liria. Dhe i sugjeroj këtyre nxënësve të studiojnë dhe ta shohin shkollën si rrugën e duhur dhe mënyrën më të mirë për të ecur në jetë dhe qëndruar larg krimit dhe shkeljes së ligjit“ theksoi Daiu.
Pas dorëzimit të librave të dhuruar, Drejtori i Burgut për të mitur në Kavajë dhe përfaqësuesit e Drejtorisë së Përgjithshme të Burgjeve, dhanë një leksion të hapur në një prej klasave të nxënësve të vitit të parë të gjimnazit “28 Nëntori”.
Gjatë prezantimit u theksuan disa aspekte të rëndësishmë të punës që bëhet vazhdimisht në institucionin e të miturve të Kavajës, për të ndihmuar rehabilitimin e tyre dhe riintegrimin në shoqëri, përmes programeve edukuese, kurseve profesionale, ushtrimit të sporteve dhe arteve të ndryshme, duke vënë në pah prirjen dhe aftësinë e gjithsecilit.
Në këtë kuptim, edhe leximi i librave është një mënyrë e shpejtë dhe edukuese në procesin e përgatitjes për rikthim në shoqëri pas lirimit. Puna me grupe të tilla vunerabël, dhe sidomos kur ata janë të mitur është një shërbim dhe kontribut në të mirë të shoqërisë dhe komunitetit. Pasi në një të nesërme, kur këta përsona të kënë mbaruar vuajtjen e dënimeve të tyre, do të jenë pjesë e shoqërisë, dhe puna me ta, do të ishte një investin për veten dhe të ardhmen gjithashtu./tesheshi.com/
