Një ngjarje e rëndë ka tronditur Kosovën pasditen e kësaj të marte. Një efektive policore “ka shuar” familjen e saj me armën e shërbimit, duke mos ia kursyer në fund dhe plumbin vetes.
Thënë ndryshe, sipas saj çfarë njofton zyrtarisht policia, një kolege e tyre ka qëlluar mbi prindërit, dy vëllezërit e më pas veten, pra duke u “vetëshuar” si familje.
“Prokuroria Themelore në Gjilan, Departamenti për Krime të Rënda, ju njofton se sot rreth orës 13h, nga një zyrtare policore janë vrarë 4 persona – anëtarë të familjes së saj dhe në fund e njëjta ka kryer vetëvrasje.
Sipas informatave të para, dyshohet se në lagjen ‘Bujanina’, në Gjilan, e ndjera V.B., zyrtare policore, në kuadër të Stacionit Policor në Gjilan, me armë zjarri ka privuar nga jeta dy prindërit dhe dy vëllezërit e saj, ndërsa, pastaj ka kryer vetëvrasje.
Në vendin e ngjarjes menjëherë kanë dalë policia, prokurori i rastit dhe ekipa mjekësore, të cilët edhe kanë konstatuar vdekjen e tyre, ndërsa me urdhër të prokurorit trupat e të njëjtëve do të dërgohen për obduksion, në Institutin e Mjekësisë Ligjore, në Prishtinë.
Rasti është duke u hetuar, ndërsa për detajet e tjera do të informoheni me kohë”, thuhet në njoftimin policor. /tesheshi.com/
