Futbollisti izraelit i Antalyaspor, Sagiv Jehezkel, i cili u ndalua pasi “festoi” një gol gjatë ndeshjes së Superligës turke në mbështetje të Izraelit dhe në kuadër të sulmeve izraelite në Gaza, u lirua pas dëgjimit në prokurori, raporton Anadolu.
Në prokurorinë e Antalias ka përfunduar seanca dëgjimore e futbollistit izraelit, i cili u ndalua herët në mëngjes në hetimin e nisur nga Kryeprokuroria Publike, me dyshimin se ka kryer veprën penale të “nxitjes së urrejtjes dhe armiqësisë publike”. Pas seancës, Jehezkel u la i lirë.
Anësori i Antalyaspor, Jehezkel ishte përjashtuar më parë nga skuadra e klubit të futbollit turk për festimin e golit të tij pro-izraelit në barazimin kundër Trabzonspor të dielën.
Zëvendëspresidenti dhe zëdhënësi i klubit turk, Evren Alkan tha se avokatët e Antalyaspor po punojnë për të ndërprerë kontratën me Jehezkel.
Pasi shënoi kundër Trabzonspor, Jehezkel ndau një mesazh solidariteti me Izraelin duke lidhur dorën me një fashë mesazhuese. Mesazhi i referohet sulmit të 7 tetorit nga Hamas dhe 100 ditëve të sulmit të Izraelit në Gaza. Fasha kishte një Yll të Davidit që simbolizon identitetin hebre.
Është shprehur edhe ministri turk i Drejtësisë, Yilmaz Tunc, i cili ka thënë se hetimi ka nisur “për shkak të veprimit të shëmtuar të futbollistit, në të cilin ai mbështeti masakrën izraelite në Gaza pasi shënoi një gol, për nxitje të urrejtjes dhe armiqësisë publike”.
Federata Turke e Futbollit dënoi “sjelljen plotësisht të papranueshme” të Jehezkel dhe filloi një hetim disiplinor kundër atyre që ishin përgjegjës.
Ndërkohë, klubi i Stambollit Basaksehir ka nisur një hetim disiplinor ndaj futbollistit izraelit Eden Karzev për mesazhe të ngjashme në rrjetet sociale. /tesheshi.com/
