Ndryshe nga takimi mes Francës dhe Irlandës, që qe i ekuilibruar në një pjesë të mirë të tij, e ku fituesi ishte në dyshim deri afër fundit të lojës, dy sfidat e tjera të mbrëmjes të së dielës kanë patur vetëm nga një protagonist.
Fillimisht do të ishte Gjermania që do të luante ndaj Sllovakisë, por pa u vënë asnjëherë në vështirësi. Dominuese që nga fillimi e gjer në fund të 90 minutave, Gjermania pati paraqitjen më të mirë deri tani në këtë Europian.
Fitorja 3-0 ndaj Sllovakisë u vulos nga golat e Boateng-ut, Mario Gomez-it dhe Draxler-it. Rezultati mund të kishte qenë më i thellë nëse Mesut Özil nuk do të dështonte nga pika e bardhë e 11-metërshit.
Draxler spikati me lojën e tij, por lojtari i ndeshjes qe Toni Kross.
Fitoren e thellë të Gjermanisë do ta pasonte një tjetër, ajo e Belgjikës ndaj Hungarisë.
Ishte mbrëmja e Eden Hazard-it, që veç faktit se shkëlqeu me lojën e tij, shënoi dhe një gol. Në fakt, edhe
pse rezultati 4-0 është tregues i epërsisë së belgëve, nëse hungarezët do ta kishin konkretizuar një prej rasteve të tyre, rrjedha e ndeshjes do të kishte qenë ndryshe.
Pjesa e parë u mbyll 1-0 për Belgjikën, me golin e shënuar nga Alderweireld në minutën e dhjetë. Tre golat e tjerë do të vinin nga fundi i takimit. Në të 78-tën minutë shënon Batshuayi, në të 79-tën i vjen radha Hazard-it ta tundë rrjetën, dhe në minutën e 91-të është Carrasco që i çon shifrat në 4-0.
Belgjika do të ndeshet me Uellsin në çerekfinale të Euro 2016-tës. /tesheshi.com/
